Shir.az xəbər verir ki, Opera Studiyasında Ramiz Rövşənin poeziya gecəsi keçirilib

Dünən Opera studiyasında Xalq şairi Ramiz Rövşənin poeziya gecəsi təşkil olunub. Tədbir söz və sənətsevərlərin böyük marağı ilə qarşılanıb.

Gecənin aparıcısı Xalq artisti Nurəddin Mehdixanlı olub. O, səhnədə çıxışı ilə tədbirə xüsusi ovqat və dərinlik qatıb.

Tədbirdə Xalq artisti Mehriban Zəki, müğənni Nisa Qasımova, Xalq artisti Gülyanaq Məmmədova və digər tanınmış simalar iştirak ediblər. Çıxışlar və səsləndirilən şeirlər tamaşaçılar tərəfindən alqışlarla qarşılanıb.

Gecə bir daha göstərib ki, poeziya yalnız misralar toplusu deyil, insan taleyinin, duyğularının və yaşanmış ömrünün bədii ifadəsidir. Belə tədbirlər ədəbiyyat və sənətə marağın davam etdiyini bir daha təsdiqləyir.

Nazlı Onur

Bu gün Azərbaycan kino və teatr sənətinin görkəmli nümayəndəsi, Xalq artisti Leyla Bədirbəylinin anadan olmasından 106 il ötür.

Leyla Bədirbəyli milli mədəniyyətimizin inkişafında mühüm rol oynamış, səhnə və ekran sənətində yaratdığı unudulmaz obrazlarla tamaşaçıların yaddaşında dərin iz qoymuşdur. Onun zəngin yaradıcılığı bu gün də Azərbaycan sənət tarixinin dəyərli səhifələrindən biri kimi xatırlanır.

Görkəmli sənətkarın əziz xatirəsi hörmətlə anılır.

Allah rəhmət etsin, ruhu şad olsun.

Xalq şairi Məmməd Arazın xatirəsi ehtiramla anılır

Shir.az xəbər verir ki, bu gün Azərbaycan poeziyasının böyük simalarından biri, Xalq şairi Məmməd Arazın doğum günüdür.

Onun poetik irsi təkcə ədəbiyyatsevərlər üçün deyil, bütövlükdə xalqımız üçün mənəvi xəzinədir.

Məmməd Araz (Məmməd İbrahimov) 14 oktyabr 1933-cü ildə Naxçıvanın Şahbuz rayonunda dünyaya gəlib. Onun şeirlərində Vətən sevgisi, torpaq yanğısı, xalqına bağlılıq, haqq və ədalət mövzuları xüsusi yer tutur. “Vətən daşı olmayandan, Vətən olmaz” deyərək milyonların ürəyinə yol tapan bu dəyərli sənətkar, vətənpərvər ədəbiyyatın simvollarından birinə çevrilib.

Şairin əsərləri sadəcə ədəbiyyat deyil, həm də xalq ruhunun tərcüməsidir. O, yazdığı hər misrada, hər sətirdə millətin dərdini, sevincini, fəxarətini ifadə edib. Onun yaradıcılığı bugünkü gənc nəsil üçün də örnəkdir.

Məmməd Arazın yaddaşlarda silinməz iz qoyan irsi, daim yaşayacaq, gələcək nəsillərə vətənə bağlılığın, dürüstlüyün və xalqına sədaqətin örnəyi kimi ötürüləcəkdir.

Ruhu şad olsun!

Nazlı Onur

Azərbaycanın tanınmış sənətkarı, Xalq artisti Əminə Yusifqızı dünyasınığ dəyişib.

Shir.az xəbər verir ki, bu barədə "Report"a mərhumun yaxınları məlumat verib.

Əminə Yusifqızı 1936-cı il sentyabrın 24-də Bakı şəhərində anadan olub. Hələ məktəb illərindən Azərbaycan Dövlət Gənc Tamaşaçılar Teatrında səhnəyə çıxaraq maraqlı çıxışları ilə diqqət mərkəzinə düşüb.

O, 1961-ci ildə Azərbaycan Dövlət Pedaqoji Universitetini bitirib. 1958–1964-cü illərdə Azərbaycan Dövlət Gənc Tamaşaçılar Teatrında, 1964–1974-cü illərdə isə Azərbaycan Milli Dram Teatrında aktrisa kimi fəaliyyət göstərib.

Səhnədə canlandırdığı Qulu (“Anacan”), Səbirə (“Son məktub”), Humay (“Komsomol poeması”), Ülkər (“Söz yarası”), Əliman (“Ana tarla”), Esse (“Şeytanın şagirdi”) və digər obrazlarla tamaşaçıların yaddaşında dərin iz qoyub.

1974-cü ildən “Azərbaycanfilm” kinostudiyasında fəaliyyət göstərən aktrisa Kinoaktyor Teatr Studiyasında da çalışıb. Eyni zamanda dublyaj və səsləndirmə sahəsində də geniş fəaliyyət göstərib, bədii qiraət ustası kimi tanınıb.

Əminə Yusifqızı “Şərikli çörək”, “Sən nə üçün susursan?”, “Bizim küçənin uşaqları”, “Musiqi müəllimi” kimi filmlərdə və televiziya tamaşalarında yaddaqalan rolları ilə tamaşaçı sevgisi qazanıb.

Allah rəhmət eləsin.

XI Bakı Beynəlxalq Kitab Sərgisinin açılış mərasimi keçirilir.

Shir.az xəbər verir ki, tədbirdə Milli Məclisin üzvləri, mədəniyyət nazirinin müavinləri, digər rəsmi şəxslər, eləcə də ədəbiyyat nümayəndələri, xarici qonaqlar və media mənsubları iştirak edirlər.

Bir həftə davam edəcək sərgidə təqdimat zonalarında, stendlərdə, konfrans otaqlarında 220-dən çox tədbirin keçirilməsi planlaşdırılır.

Sərgidə uşaqlar və böyüklər üçün ustad dərsləri, inklüzivlik və digər aktual mövzular üzrə kitab təqdimatları, imza günləri, konfranslar, simpoziumlar, müsabiqələr, qiraət və musiqi saatları və kitab sənayesi sektorunun subyektləri arasında əməkdaşlıq platformaları təşkil ediləcək.

Niderlandın Haaqa şəhərində dahi Azərbaycan bəstəkarı Üzeyir Hacıbəylinin 140 illik yubileyi və Milli Musiqi Günü münasibətilə Azərbaycan musiqisinin incisi – "Leyli və Məcnun" operası nümayiş olunub.

Bu barədə Shir.az-a Azərbaycanın Niderland Krallığındakı səfirliyindən məlumat verilib.

Tədbir Azərbaycan-Niderland Odlar Yurdu Cəmiyyətinin təşkilatçılığı və Azərbaycan Respublikasının Diasporla iş üzrə Dövlət Komitəsinin dəstəyi ilə baş tutub.

Rəsmi hissədə Azərbaycanın dövlət himni səsləndirilib, torpaqlarımızın azadlığı uğrunda canlarını fəda etmiş şəhidlərimizin əziz xatirəsi birdəqiqəlik sükutla yad edilib.

Tədbiri giriş sözü ilə açan Azərbaycanın Niderlanddakı səfiri Məmməd Əhmədzadə Üzeyir Hacıbəylinin Azərbaycan mədəniyyətinin paytaxtı olan Şuşada anadan olduğunu bildirərək yubiley tədbirlərinin məhz azad edilmiş Şuşa və Qarabağda keçirilməsinin mühüm tarixi və mənəvi əhəmiyyət daşıdığını deyib.

Daha sonra çıxış edən Azərbaycan-Niderland Odlar Yurdu Cəmiyyətinin sədri, musiqiçi Firəngiz Bağırova "Leyli və Məcnun" operasının tarixi əhəmiyyəti, onun yaranma prosesi və ilk ifaçıları barədə məlumat verib. O bildirib ki, "Leyli və Məcnun" operası zamanla Azərbaycanın mədəni irsinin parlaq nümunəsinə çevrilib, ölkəmizdə və dünyanın müxtəlif ölkələrində dəfələrlə səhnələşdirilib və 100 illik yubileyi YUNESKO tərəfindən bəşəri əhəmiyyətli hadisə kimi qeyd olunub.

Tədbirin bədii hissəsində, Niderland və Almaniyada yaşayan azərbaycanlı xanəndə və musiqiçilərin ifasında "Leyli və Məcnun" operasından seçilmiş parçalar təqdim olunub.

İfalar tamaşaçılar tərəfindən böyük maraq və alqışla qarşılanıb.

Azərbaycan Prezidenti İlham Əliyev Bakıda Azərbaycan Yazıçılar Birliyinin Səməd Vurğun adına Yaradıcılıq Evinin açılışında iştirak edib.

Shir.az xəbər verir ki, iqtisadiyyat naziri Mikayıl Cabbarov dövlət başçısına Yaradıcılıq Evində yaradılmış şərait barədə məlumat verib.

Bildirilib ki, Xəzər rayonunun Şüvəlan qəsəbəsində yerləşən kompleksin ərazisi 3 hektara yaxındır. Burada "suite" və "standart" tipli olmaqla ümumilikdə 43 otaq var. Kompleksdəki 174 yerlik konfrans zalında müxtəlif tədbirlərin, o cümlədən yaradıcılıq gecələrinin, yazıçılarla görüşlərin və digər mədəni tədbirlərin keçirilməsi mümkün olacaq. Burada kinoteatr, kitabxana, qapalı, həmçinin açıq havada restoranlar, kafe, fitnes zonası da fəaliyyət göstərəcək. Eyni zamanda, futbol, tennis və uşaq oyun meydançaları da istirahət edənlərin ixtiyarına veriləcək.

Qeyd edək ki, kompleksin bu cür müasir səviyyədə inşası ölkəmizdə yaradıcı insanların fəaliyyətinə göstərilən dövlət dəstəyinin növbəti təzahürü olmaqla, ilk növbədə, onların istirahətinin təmin edilməsi baxımından mühüm əhəmiyyət daşıyır.

Azərbaycan dövlətinin həyata keçirdiyi siyasət nəticəsində yaradılmış şərait mədəniyyət və incəsənət sahəsində çalışanların fəaliyyətinin daha da canlanmasına səbəb olmaqla yanaşı, bu sahənin inkişafına mühüm töhfə verir. Prezident İlham Əliyevin diqqət və qayğısı sayəsində yaradıcı şəxslərin fəaliyyətinin stimullaşdırılması, onların əməyinə yüksək qiymətin verilməsi, sosial təminatlarının, mənzil-məişət şəraitlərinin daha da yaxşılaşdırılması istiqamətində ardıcıl işlər görülür. Bundan başqa, istirahət və yaradıcılıq imkanlarının genişləndirilməsi məqsədilə yaradıcılıq ittifaqlarının, yaradıcılıq evlərinin və sanatoriyaların fəaliyyəti də dövlət səviyyəsində dəstəklənir.

Azərbaycan peşəkar musiqisinin banisi, dahi bəstəkar Üzeyir Hacıbəyliyə həsr olunmuş XVII Beynəlxalq Musiqi Festivalı başlayır.

Bu barədə Shir.az Mədəniyyət Nazirliyindən məlumat verilib.

Bildirilib ki, Heydər Əliyev Fondunun və Mədəniyyət Nazirliyinin təşkilatçılığı, Türk Mədəniyyəti və İrsi Fondu, eləcə də İCESCO-nun dəstəyi ilə reallaşacaq təsbir sentyabrın 18-də start götürəcək.

Bakı, Sumqayıt, Şuşa, Gəncə, Ağcabədi, Naxçıvan və Qazax şəhərlərində keçiriləcək festival çərçivəsində möhtəşəm konsertlər, tamaşalar, sərgilər, elmi simpozium və ustad dərsləri təşkil olunacaq.

Tədbirdə Azərbaycan musiqiçiləri ilə yanaşı, Türkiyə, ABŞ, Almaniya, Fransa, İsveçrə, Koreya və digər ölkələrdən tanınmış ifaçılar və musiqişünaslar çıxış edəcəklər.

Festival sentyabrın 28-dək davam edəcək.

Bakıda oktyabrın 6-12-də ilk dəfə İslam Əməkdaşlıq Təşkilatının (İƏT) və Mədəniyyət Nazirliyinin təşkilatçılığı ilə "İƏT Mədəniyyət Festivalı: Bakı Yaradıcı Həftə – 2025" keçiriləcək.

Shir.az xəbər verir ki, bu barədə nazirlik məlumat yayıb.

Bildirilib ki, festivalda mədəniyyətlərarası dialoqun inkişaf etdirilməsi, İslam dəyərlərinin – tolerantlıq, sülh və müxtəlifliyə hörmətin təbliği əsas istiqamətlərdən olacaq. Bununla yanaşı, iqtisadiyyat, təhsil, elm və turizm sahələrində birgə layihələrin təşviqi, üzv dövlətlər arasında dayanıqlı tərəfdaşlıqların qurulması və yaradıcı sənayelərin qlobal iqtisadiyyata inteqrasiyasının gücləndirilməsi nəzərdə tutulur.

Tədbirdə 50-dən çox ölkədən 300-dən artıq qonağın – dövlət rəsmiləri, beynəlxalq təşkilatların nümayəndələri, tanınmış elm, mədəniyyət və incəsənət xadimləri, eləcə də yaradıcı sənaye üzrə mütəxəssislərin iştirakı gözlənilir. Ümumilikdə festival çərçivəsində beş mindən çox iştirakçı bir araya gələcək.

Festival çərçivəsində İƏT üzv dövlətləri mədəniyyət nazirlərinin yüksək səviyyəli görüşü, "Mədəni və yaradıcı sənayelər forumu" (MYFORUM), "Creative Village": mədəni və yaradıcı sənayelər sərgisi" (MYEXPO), "Baku Cinema Breeze – 2025" beynəlxalq kino proqramı, "Şərq moda nümayişi" – İƏT ölkələrinin gənc və tanınmış dizaynerlərinin təqdimatları, oyun texnologiyaları üzrə beynəlxalq sammit (G-HUB), eləcə də teatr, musiqi, rəqs və animasiya sahələri ilə bağlı müxtəlif səpkili mədəni layihələr planlaşdırılır.

O, milli kinomuzda Mirzə Səfər, Dədə Qorqud, Bəxtiyar, Qəmərlinski və başqa neçə-neçə unudulmaz obrazlar yaradıb. “Böyük dayaq” filmində çəkildiyi ilk rolu - Qaraş obrazı ilə kino aktyoru kimi özünün böyük potensialı olduğunu sübut edib. Yaratdığı rolların xarakterik xüsusiyyətləri həm də həmin obrazların qəhrəmanlardan ibarət olması idi...

Shir.az xəbər verir ki, bu gün kino sənətimizin inkişafında böyük xidmətləri olan Dövlət mükafatı laureatı, Xalq artisti Həsən Məmmədovun anım günüdür.

Görkəmli aktyor Həsən Məmmədov 1938-ci il noyabrın 22-də Salyan rayonunda doğulub. Burada 2 nömrəli orta məktəbi bitirdikdən sonra Azərbaycan Dövlət Universitetinin (indiki Bakı Dövlət Universiteti) Fizika-riyaziyyat fakültəsinə daxil olub. İkinci kursda universitetdən çıxıb və bir müddət müxtəlif teatrların yardım heyətində aktyorluq edib. 1958-ci ildə Mirzağa Əliyev adına Azərbaycan Dövlət Teatr İnstitutunun Dram və kino aktyorluğu fakültəsinə daxil olub. Tələbəlik illərində müəyyən fasilələrlə Dövlət radiosunda diktor işləyib, 1962-ci ildə məşhur səhnə xadimi Mehdi Məmmədovun kursunu bitirib və təyinatla Akademik Milli Dram Teatrına göndərilib. Həmin ildən başlayaraq on il ərzində kino çəkilişləri ilə əlaqədar fasilələrlə burada çalışıb.

Kino aktyoru kimi ildən-ilə məşhurlaşan Həsən Məmmədov 1972-ci il fevralın 2-də “Azərbaycanfilm” kinostudiyasına işə qəbul edilib. O, 1989-cu ildə Cəmil Əlibəyovun “Gülüstanda qətl” dramının tamaşasında İlyas İbrahimov rolunu oynayıb. O, Akademik Teatrın direktoru və bədii rəhbəri Həsən Turabovun dəvəti ilə 1992-ci ildən ömrünün sonunadək doğma kollektivin aktyor truppasında çalışıb.

Aktyorun rolları siyahısında milli və Avropa klassiklərinin, çağdaş Azərbaycan və əcnəbi dramaturqların əsərlərinin tamaşalarındakı səhnə obrazları var.

Kinoda çəkildiyi çoxsaylı rollar Həsən Məmmədovun yaradıcılığında xüsusi yer tutur. O, “Böyük dayaq” (Qaraş), “Arşın mal alan” (Əsgər), “Gün keçdi” (Oqtay), “Arxadan vurulan zərbə” (Qəmərlinski), “Bizi bağışlayın” (Nəriman), “Birisi gün gecə yarısı” (Baba Əliyev), “İstintaq” (Murad), “Dədə Qorqud” (Dədə Qorqud), “Axırıncı aşırım” (Abbasqulu ağa Şadlinski), “Sevil” (Balaş), “Yeddi oğul istərəm” (Bəxtiyar), “Bir cənub şəhərində” (Murad), “Qızıl qaz” (Fərman), “Bakıda küləklər əsir” (General), “Alma almaya bənzər” (Qurban), “Səmt küləyi” (Əlibala), “İstintaq davam edir” (Əzimov), “Şahid qız” (Polkovnik), “Qəm pəncərəsi” (Məmmədhəsən əmi), “Papaq” (Mirzə Səfər), “Həm ziyarət, həm ticarət” (Əlimurad), “Zirvə” (Kamil) filmlərində yaddaqalan rollar yaradıb.

Həsən Məmmədov teatr və kino sənətində göstərdiyi xidmətlərə görə 1971-ci ildə Əməkdar artist, 1982-ci ildə isə Xalq artisti fəxri adlarına layiq görülüb. “İstintaq” bədii filmindəki Murad roluna görə 1981-ci ildə SSRİ Dövlət, "Birisi gün gecə yarısı" kino lentindəki Baba Əliyev obrazına görə isə Azərbaycan Respublikasının Dövlət mükafatları ilə təltif edilib.

Görkəmli aktyor 2003-cü il avqustun 26-da vəfat edib.