Azərbaycan Milli Olimpiya Komitəsində (MOK) təhlükəsiz idman prinsiplərinin gücləndirilməsi və müstəqil nəzarətin təmin edilməsi məqsədilə Təhlükəsiz İdman Komissiyası yaradılıb.

Shir.az xəbər verir ki, komissiyanın sədri MOK-un baş katibi Azər Əliyev təyin olunub.

Komissiyanın tərkibində Təhminə Tağızadə – Azərbaycan Milli Antidopinq Agentliyinin icraçı direktoru, Elgün Səfərov – Ailə, Qadın və Uşaq Problemləri üzrə Dövlət Komitəsinin şöbə müdiri, Xəzər İsayev – Ədalətli Oyunlar Komissiyasının sədri və Fəridə Əzizova – Atletlər Komissiyasının sədri yer alıblar.

Bildirilib ki, komissiya idman mühitində etik dəyərlərin qorunmasına, idmançıların rifahının təmin olunmasına və təhlükəsiz idman mühitinin inkişafına töhfə verəcək.

"Bələdiyyələrin vahid informasiya sisteminə ötürüləcək və həmin sistemdən əldə ediləcək məlumatların dairəsi" təsdiq edilib.

Shir.az xəbər verir ki, Baş nazir Əli Əsədov bununla bağlı Qərar imzalayıb.

Qərara əsasən, bələdiyyələrin vahid informasiya sisteminə ötürüləcək və həmin sistemdən əldə ediləcək məlumatlar Elektron Hökumət İnformasiya Sistemi vasitəsilə Azərbaycan Respublikası Prezidentinin 2018-ci il 12 sentyabr tarixli 263 nömrəli Fərmanı ilə təsdiq edilmiş "Dövlət informasiya ehtiyatları və sistemlərinin formalaşdırılması, aparılması, inteqrasiyası və arxivləşdirilməsi Qaydaları"na uyğun olaraq əldə edilir.

Azərbaycan müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyev ilə Serbiya Silahlı Qüvvələrinin Baş Qərargah rəisi general Milan Moysiloviç arasında telefon danışığı olub.

Bu barədə Shir.az-a Müdafiə Nazirliyindən məlumat verilib.

Bildirilib ki, danışıq Serbiya tərəfinin təşəbbüsü ilə baş tutub.

Tərəflər ölkələr arasında hərbi və hərbi-texniki əməkdaşlığın cari vəziyyəti və perspektivlərini müzakirə edib, regionda cərəyan edən proseslər və təhlükəsizlik məsələlərinə dair ətraflı fikir mübadiləsi aparıblar.

Ermənistanın Baş naziri Nikol Paşinyan Prezident İlham Əliyevə Azərbaycan vasitəsilə dəmir yolu yükdaşımalarının bərpasına görə minnətdarlığını ifadə edib.

Shir.az xəbər verir ki, baş nazir bu barədə bu gün Avropa Parlamentində çıxışı zamanı bəyan edib.

Fövqəladə hallar naziri Kəmaləddin Heydərov Qəbələ şəhərində vətəndaşları qəbul edəcək.

Fövqəladə Hallar Nazirliyindən Shir.az-a verilən məlumata görə, nazir Kəmaləddin Heydərov tərəfindən 13 mart tarixində Qəbələ şəhərində, Nazirliyin Şimal-qərb Regional Mərkəzinin binasında saat 10:00-dan Qəbələ, Oğuz, İsmayıllı və Ağdaş rayonları sakinlərinin qəbulu keçiriləcək.

Qəbula gələn vətəndaşların qeydiyyatı 12 mart tarixində Nazirliyin Şimal-qərb Regional Mərkəzinin binasında saat 09:00-da başlayacaq.

Qəbulda yalnız Fövqəladə Hallar Nazirliyinin səlahiyyətlərinə aid müraciətlərə baxılacaq.

Qəbula gələn vətəndaşlar şəxsiyyəti təsdiq edən sənəd təqdim etməlidirlər.

Əlaqə:

tel: +994 (12) 512-01-14

e-mail: info@fhn.gov.az

Fövqəladə Hallar Nazirliyinin aidiyyəti qurumları tərəfindən fövqəladə hallarla bağlı davranış qaydaları barədə əhalinin maarifləndirilməsi məqsədilə silsilə tədbirlər keçirilib.

Shir.az xəbər verir ki, bu barədə FHN məlumat yayıb.

Belə ki, FHN-in Dövlət Yanğın Nəzarəti, Kiçikhəcmli Gəmilərə Nəzarət və Sularda Xilasetmə Dövlət xidmətlərinin mütəxəssislərinin də iştirakı ilə Bakı Regional Mərkəzi (RM) tərəfindən Bakı şəhəri, Suraxanı rayon 278 nömrəli, Nərimanov rayon 45 və 207 nömrəli, Binəqədi rayon 30 nömrəli tam orta məktəblərində, Yasamal rayonunda yerləşən Fizika, riyaziyyat və informatika təmayüllü respublika liseyində və Binəqədi rayonunda yerləşən Bakı şəhəri üzrə Təhsil İdarəsinin 1 saylı Xidmət və əməliyyat mərkəzində, Sumqayıt RM tərəfindən Abşeron rayonu, Masazır kənd 4 nömrəli tam orta ümumtəhsil məktəbində, Sumqayıt şəhər 62 nömrəli körpələr evi-uşaq bağçasında, Abşeron Rayon İcra Hakimiyyəti başçısının Novxanı kənd inzibati ərazi dairəsi üzrə nümayəndəliyində və Abşeron rayonu, Qobu qəsəbə 1 nömrəli tam orta ümumtəhsil məktəbində, Gəncə RM tərəfindən Gəncə İdman Sarayında, “Xəmsə Park” ticarət mərkəzində və “Premium Hotel Gəncə”də, Şimal-qərb RM tərəfindən Qəbələ rayonu, F.Həmidov adına Mıxlıqovanq və Kötüklü kənd tam orta məktəblərində, Şəki şəhər Ə.Abdullayev adına 21 və 10 nömrəli tam orta məktəblərində, Muğan RM tərəfindən Biləsuvar rayon 4 nömrəli və Salyan rayonu, Arbatan kənd tam orta ümumtəhsil məktəblərində, Aran RM tərəfindən Göyçay rayonu, Aşağı Qaraməryəm kənd tam orta məktəbində, Yevlax Rayon İcra Hakimiyyəti başçısının Havarlı kənd inzibati ərazi dairəsi üzrə nümayəndəliyinin inzibati binasında işləməyən əhali üçün və Mingəçevir şəhəri 20 nömrəli tam orta məktəbində, Cənub RM tərəfindən Lənkəran rayonu, N.Axundov adına Boladi kənd 1 nömrəli tam orta məktəbində və Şimal RM tərəfindən Şabran rayonu, Əmirxanlı kənd tam orta məktəbində maarifləndirmə tədbirləri keçirilib.

Tədbirlərin keçirilməsində məqsəd baş verə biləcək təbii və texnogen xarakterli fövqəladə hadisələrlə bağlı zəruri davranış qaydaları barədə vətəndaşlara müvafiq biliklərin verilməsi olub.

Tədbirlərdə fövqəladə halların təsnifatı, ölkəmiz üçün xarakterik olan fövqəladə hallar, o cümlədən yanğın və zəlzələ ilə bağlı zəruri davranış qaydaları barədə ətraflı məlumat verilib, FHN-in “112” qaynar telefon xəttinin təyinatı izah olunub və ilkin yanğınsöndürmə vasitələrindən istifadə qaydaları əyani şəkildə nümayiş etdirilib.

İnteraktiv formada keçirilən tədbirlər zamanı suallar ətraflı cavablandırılıb.

Bu gün İranın Naxçıvan beynəlxalq Hava Limanına dron hücumu barədə xəbərlərin yayılmasından qısa müddət sonra Güney azərbaycanlılar geniş kampaniya başladıblar.

Shir.az xəbər verir ki, xüsusən xaricdə yaşayan Güney azərbaycanlılar mövzu ilə bağlı çoxsaylı paylaşımlar ediblər.

Güneyli sosial media istifadəçiləri və milli-siyasi fəallar Tehran rejiminin dron hücumunu pisləyib, bunun İranın daxilində ağır nəticələrə səbəb olacağı barədə xəbərdarlıq ediblər.

“İndiki həssas mərhələdə Azərbaycan Respublikasına qarşı istənilən təxribat əməli rəsmi Bakının mövqeyindən asılı olmayaraq, Güney azərbaycanlılara qarşı saymamazlıq, hörmətsizlik və müharibə elanı kimi dəyərləndirilə bilər”, - güneylilər bildirib.

Onlar İran-Amerika-İsrail müharibəsində Azərbaycan hökumətinin ədalətli və dost mövqe tutmasına baxmayaraq, Tehran rejiminin Naxçıvana dron hücumunu İslam Respublkasının intihar cəhdi adlandırıblar:

“Tehran rejimi hələ də reallıqdan uzaq olan siyasətləri ilə bütün qonşulara qarşı təcavüzə əl atmaqla özünü daha da dərinə batırmağa çalışır. Xüsusən Azərbaycan Respublikasına qarşı təxribat hərəkəti İslam Respublikasının sonunun yaxınlaşmasına, bu sonun isə daha ağrılı olmasına səbəb ola bilər. Azərbaycan Respublikasına qarşı istənilən təcavüz aktının baş verəcəyi təqdirdə İrana qarşı ön cəbhə xətti Tehranda, Kərəcdə, Zəncandakı azərbaycanlılar tərəfindən qurulacaq!”

İran ordusunda xidmət edən azərbaycanlı hərbçilərin ordu sıralarını tərk etmələri barədə xəbərlər yayılıb.

Shir.az xəbər verir ki, bu barədə yerli mənbələr məlumat yayıb.

Məlumatda bildirilib ki, xüsusən Tehran rejiminin Türkiyə və Azərbaycana qarşı təcavüzkar və təhdidamiz bəyanatları və təxribatçı əməlləri azərbaycanlı hərbçilərin xidmətdən imtina etmələrində mühüm rol oynayır.

Bildirilib ki, 11-ci Marağa Artilleriya Qrupunda xidmət edən hərbçilərin əhəmiyətli hissəsi xidmət yerlərini tərk ediblər.

5 mart tarixində Özbəkistan Respublikasının xarici işlər naziri Baxtiyor Saidov Azərbaycan Respublikasının xarici işlər naziri Ceyhun Bayramova zəng vurub.

XİN-dən Shir.az-a verilən məlumata görə, telefon danışığı zamanı Azərbaycan Respublikasının Naxçıvan Muxtar Respublikası ərazisinə İran İslam Respublikası ərazisindən dron hücumlarının narahatlıq doğurduğu bildirilib.

Nazir Ceyhun Bayramov qarşı tərəfə dron hücumları barədə ətraflı məlumat verib. O bildirib ki, Azərbaycan Respublikasının ərazisinə qarşı həyata keçirilmiş bu hücum beynəlxalq hüququn norma və prinsiplərinin pozulmasıdır və regionda gərginliyin artmasına xidmət edir.

Azərbaycan tərəfinin baş verən hücum ilə bağlı İran tərəfindən qısa müddət ərzində aydınlıq gətirilməsinin, izahat verilməsinin və bu kimi halların gələcəkdə təkrarlanmaması üçün zəruri təxirəsalınmaz tədbirlərin görülməsinin tələb olunduğu diqqətə çatdırılıb.

Azərbaycan XİN dron hücumu ilə bağlı məlumat yayıb.

Shir.az xəbər verir ki, məlumatda 1 ədəd dronun Naxçıvan Muxtar Respublikasının Hava Limanının terminal binasına, digər bir dronun isə Şəkərabad kəndində məktəb binasının yaxınlığına düşdüyü qeyd olunub.

Hücum Hava Limanının binasına zərər dəyməsi və iki nəfər mülki şəxsin xəsarət alması ilə nəticələnib.

***

İran ərazisindən həyata keçirilən dron hücumları zamanı xəsarət alanların vəziyyəti stabildir.

Bu barədə Azərtac-a Naxçıvan Muxtar Respublikası Xəstəxanasının Təcili yardım şöbəsinin müdiri Sahib Abuzərov bildirib.

“Dron hücumu ilə bağlı təcili yardım şöbəsinə 4 nəfər müraciət edib. 2 nəfər barotravma alıb, 2 nəfərə isə kürək nahiyəsinin küt travması diaqnozu qoyulub. Xəstələrə ilkin yardım olunub, vəziyyətləri stabildir və müvafiq şöbələri yerləşdiriliblər”, - deyə o vurğulayıb.