Bu gün baş verən hadisələrlə bağlı fikrimi bölüşmək istəyirəm…

Səhər saatlarından etibarən İran ərazisindən Naxçıvana pilotsuz uçuş aparatları ilə hücum edildiyi barədə məlumatlar yayıldı. Hədəf alınan yerlər arasında hava limanı, məktəb və mülki infrastruktura aid obyektlərin olduğu bildirildi. Təəssüf ki, bu hadisə nəticəsində xəsarət alanların olduğu barədə də məlumat verildi. Bu cür hadisələr təbii olaraq hər birimizi narahat edir. Çünki söhbət birbaşa dövlətimizin təhlükəsizliyindən, vətəndaşlarımızın həyatından və ölkəmizin suverenliyindən gedir.

Belə məqamlarda cəmiyyətdə müxtəlif fikirlərin səslənməsi də təbiidir. Kimisi deyir ki, bunu İran edib, kimisi isə iddia edir ki, bu başqa qüvvələrin oyunu və siyasətidir, məqsəd isə Azərbaycanla İran arasında gərginlik yaratmaqdır. Sosial şəbəkələrdə, mediada, müxtəlif platformalarda hər kəs öz baxış bucağını paylaşır.

Amma mən düşünürəm ki, belə həssas və mürəkkəb məsələlərdə emosiyalarla yox, dövlətin rəsmi mövqeyi ilə hərəkət etmək daha doğru yanaşmadır. Açıq desək, biz cənab prezidentdən daha çox məlumatlı deyilik. Dövlət başçısının əlində həm təhlükəsizlik strukturlarının məlumatları, həm diplomatik kanallardan əldə olunan informasiyalar, həm də bizim bilmədiyimiz çoxsaylı faktlar var. Bu səbəbdən də hadisələrin arxa planını və həqiqi mahiyyətini ən yaxşı bilən şəxs məhz dövlət başçısıdır.

Az öncə çıxışında cənab prezident xüsusi olaraq vurğuladı ki, bu, İranın Azərbaycana qarşı törətdiyi ilk təxribat və ya terror xarakterli hadisə deyil. O xatırlatdı ki, Azərbaycan dövləti hər zaman qonşuluq münasibətlərinə hörmətlə yanaşıb və ən çətin məqamlarda belə qarşı tərəfə ehtiram göstərib.

Prezident qeyd etdi ki, İranın ali dini liderlərindən biri olan Xomeyni vəfat edəndə bir çox dövlət başçıları İran səfirliyinə gedib başsağlığı verməmişdi. Lakin buna baxmayaraq, Azərbaycan Prezidenti şəxsən İran səfirliyinə gedərək başsağlığını bildirmişdi. Bu addım Azərbaycanın diplomatik mədəniyyətinin, insani dəyərlərə və qonşuluq münasibətlərinə verdiyi önəmin bariz nümunəsi idi.

Bu gün isə baş verən hadisələr təbii olaraq cəmiyyətdə ciddi suallar yaradır. Çünki Azərbaycan hər zaman regionda sülhün, sabitliyin və qarşılıqlı hörmətin tərəfdarı olub.

Mən də bir Azərbaycan Respublikasının vətəndaşı və jurnalist olaraq belə həssas məsələlərdə öz mövqeyimi açıq şəkildə ifadə edirəm: mən dövlətimin və prezidentimin yanındayam. İnanıram ki, ölkəmizin təhlükəsizliyi, milli maraqları və gələcəyi ilə bağlı ən doğru qərarları məhz dövlət başçısı verir. Hər şeyin nə vaxt və necə edilməli olduğunu, hansı addımın nə zaman atılmalı olduğunu o, hamımızdan daha yaxşı bilir.

Belə məqamlarda ən vacib məsələ birlik və həmrəylikdir. Dövlətimizin yanında olmaq, emosiyalara qapılmadan sağlam düşüncə ilə davranmaq və milli maraqları hər şeydən üstün tutmaq hər birimizin borcudur. 

Nazlı Onur