Azərbaycan Prezidenti İlham Əliyev martın 6-da Moldova Respublikasının Baş nazirinin müavini, xarici işlər naziri Mixay Popşoini qəbul edib.

Shir.az xəbər verir ki, görüşdə Mixay Popşoi qəbul üçün təşəkkürünü bildirərək Moldova Prezidenti Maya Sandunun salamlarını dövlət başçısına çatdırıb. Prezident İlham Əliyev salamlara görə minnətdarlığını ifadə edərək onun da salamlarını Moldova Prezidentinə çatdırmağı xahiş edib.

Dövlət başçısı beynəlxalq təşkilatlar çərçivəsində Maya Sandu ilə görüşlərini və aparılmış müzakirələri məmnunluqla xatırladıb.

Görüş zamanı Mixay Popşoi İranın pilotsuz uçuş aparatları ilə Azərbaycana qarşı həyata keçirdiyi hücumları Moldovanın qətiyyətlə pislədiyini bildirib və bu məsələdə ölkəsinin Azərbaycanla həmrəy olduğunu vurğulayıb. O, hadisə zamanı xəsarət alan şəxslərə tezliklə şəfa arzulayıb.

Qonaq xalqlar arasında mövcud olan dostluq münasibətlərini qeyd edərək Moldovanın çətin günlərində Azərbaycanın göstərdiyi dəstəyin ölkəsində hər zaman yüksək qiymətləndirildiyini deyib.

Prezident İlham Əliyev nümayiş etdirilən mövqeyə görə təşəkkürünü bildirib.

Söhbət zamanı Azərbaycan və Moldovanın daim bir-birinin ərazi bütövlüyünü və suverenliyini dəstəklədiyi vurğulanıb. Eyni zamanda, siyasi, iqtisadi-ticari, enerji və digər sahələrdə ikitərəfli əməkdaşlığın inkişaf etdiyi qeyd olunub, qarşılıqlı səfərlərin münasibətlərin genişlənməsində mühüm rol oynadığı bildirilib.

Görüşdə Mixay Popşoinin səfərinin əlaqələrin daha da möhkəmlənməsinə töhfə verəcəyinə əminlik ifadə olunub, həmçinin beynəlxalq təşkilatlar çərçivəsində əməkdaşlıq, siyasi dialoqun intensivləşdirilməsi və qarşılıqlı maraq doğuran digər məsələlər ətrafında fikir mübadiləsi aparılıb.