Martın 5-də Naxçıvana qarşı həyata keçirilən pilotsuz uçuş aparatı (PUA) hücumları regionda onsuz da həssas olan təhlükəsizlik balansını ciddi şəkildə sarsıdıb.

Bu fikirləri Shir.az-a açıqlamasında Milli Məclisin deputatı Novruzəli Aslanov səsləndirib. Deputat bildirib ki, İran ərazisindən havaya qalxan dronlardan biri Naxçıvan Beynəlxalq Hava Limanının terminal binasına, digəri isə Şəkərabad kəndində məktəb yaxınlığına düşüb. Onun sözlərinə görə, seçilən hədəflər hadisənin təsadüfi deyil, müəyyən mesaj vermək məqsədi daşıdığını göstərir.

Millət vəkili qeyd edib ki, Azərbaycan uzun illərdir qonşuluq münasibətlərində sabit və konstruktiv mövqe nümayiş etdirib və ölkə ərazisi heç vaxt İran üçün təhlükə mənbəyi olmayıb. Əksinə, rəsmi Bakı dəfələrlə humanitar və diplomatik jestlərlə sülhə sadiqliyini göstərib.

“İranda baş verən hadisələr fonunda Azərbaycan Prezidentinin qonşu ölkəyə humanitar yardım imkanlarını nəzərdən keçirməsi də sülhməramlı niyyətin göstəricisi idi. Bu fonda mülki infrastruktura qarşı hücum qərarı siyasi etikaya açıq ziddiyyət təşkil edir”, – deyə deputat bildirib.

Novruzəli Aslanov vurğulayıb ki, Azərbaycanın suveren ərazilərinə qarşı həyata keçirilən bu hücumla bağlı elə həmin gün Prezident İlham Əliyevin sədrliyi ilə Təhlükəsizlik Şurasının iclası keçirilib. Dövlət başçısı çıxışında hadisəni Azərbaycan dövlətinə qarşı terror aktı kimi qiymətləndirib və bu cinayəti törədənlərin məsuliyyətə cəlb olunmasını tələb edib.

Deputatın sözlərinə görə, hava limanı istənilən ölkənin mülki həyat damarlarından biridir və oraya zərbə endirmək təkcə infrastruktura ziyan vurmaq deyil, insanların təhlükəsizlik hissini sarsıtmaq deməkdir. O əlavə edib ki, məktəb ətrafında baş verən partlayış isə potensial olaraq uşaqların həyatını riskə atmaqla psixoloji təsir yaratmağa hesablanmış addım təsiri bağışlayır.

“Beynəlxalq hüquq mülki obyektlərin toxunulmazlığını açıq şəkildə qoruyur və bu prinsipin pozulması ciddi siyasi məsuliyyət doğurur. Diplomatik jestləri hərbi təzyiqlə əvəzləmək regionda etimad mühitini sarsıdır”, – deyə millət vəkili bildirib.

Novruzəli Aslanov xatırladıb ki, bir müddət əvvəl Azərbaycanın Tehrandakı səfirliyinə qarşı terror aktı törədilmişdi və Azərbaycan həmin hadisəyə də sərt reaksiya vermişdi. Onun sözlərinə görə, bu dəfə də rəsmi Bakı dövlətin təhlükəsizliyinə yönəlmiş təhdidlərə qətiyyətlə cavab verəcək.

Deputat sonda vurğulayıb ki, regionun gələcəyi hərbi jestlərdən deyil, qarşılıqlı hörmət və beynəlxalq hüquqa sadiqlikdən asılıdır. Onun sözlərinə görə, hazırda İranın seçdiyi xətt bu prinsiplərin əks istiqamətindədir və bu səbəbdən də haqlı olaraq kəskin şəkildə pislənir.