Birləşmiş Ərəb Əmirliklərinin (BƏƏ) vitse-prezidenti, baş naziri və Dubay Əmirliyinin hökmdarı Şeyx Məhəmməd bin Rəşid Əl-Məktumun himayəsi altında keçiriləcək dördüncü Dünya Polis Sammiti mayın 13-dən 15-dək Dubay Dünya Ticarət Mərkəzində baş tutacaq.
Shir.az “Emirates” informasiya agentliyinə istinadla xəbər verir ki, Dubay Polis Departamenti tərəfindən təşkil edilən tədbirdə 100-dən çox ölkədən 150-dən çox məruzəçi və təhlükəsizlik xidməti rəhbəri iştirak edəcək.
Sammit hüquq-mühafizə orqanlarında bilik mübadiləsi, qabaqcıl texnologiyaların diqqətə çatdırılması, icma təhlükəsizliyi strategiyaları və transsərhəd əməkdaşlıq üçün qlobal platforma rolunu oynayır.
“Emirates” Hava Yolları Qrupunun sədri və baş icraçı direktoru Şeyx Əhməd bin Səid Əl-Məktum bildirib ki, tərəfdaşlıq aviasiya təhlükəsizliyini inkişaf etdirmək, kiber və terrorizm təhdidlərinə qarşı qlobal səyləri dəstəkləmək üçün ortaq öhdəliyi əks etdirir.
Dubay Polis Departamentinin rəisi general-leytenant Abdulla Xəlifə Əl-Marri bildirib ki, sammit Dubayın təhlükəsizlik və qlobal əməkdaşlıq sahəsində liderliyini gücləndirir. O əlavə edib: “Təsirli beynəlxalq tədbirlər vasitəsilə biz inkişaf edən təhdidləri gözləyirik və onlara qarşı mübarizə aparırıq, bütün dünyada icma təhlükəsizliyini gücləndiririk”.
Sammit çərçivəlində təşkil olunacaq xüsusi sessiyalarda rəqəmsal məkanda uşaq hüquqları və müdafiəsinə üzrə müzakirələrdə beynəlxalq ekspertlər iştirak edəcəklər. Tədbir çirkli pulların “yuyulmasına” qarşı mübarizə, mütəşəkkil cinayətkarlıq, aviasiya təhlükəsizliyi, kibercinayətkarlıq, polisdə süni intellekt, yol hərəkəti təhlükəsizliyi, narkotik, rəqəmsal transformasiya və icma polisi kimi mövzuları əhatə edən 12 istiqamət üzrə dörd platformanı əhatə edəcək.
FTB, UNODC, EUROPOL və Beynəlxalq Polis Rəisləri Assosiasiyası da daxil olmaqla qlobal qurumlar tərəfindən dəstəklənən tədbirdə “Samsung”, ESRI, “Presight”, “Dahua Technology”, “Inkas Armored Vehicles” və “Aksum Marine” kimi strateji tərəfdaşlar da iştirak edir.
Bundan başqa, 200-dən çox şirkətin iştirak edəcəyi sərgidə yeni nəsil süni intellekt, müşahidə, zirehli maşınlar və dəniz təhlükəsizliyi həlləri nümayiş etdiriləcək ki, bu da sammitin ictimai təhlükəsizlik innovasiyaları üzrə qlobal mərkəz rolunu gücləndirəcək.
