Sevgi - adını demək asandır, yaşamaq isə cəsarət, səmimiyyət və dərinlik tələb edir. Hər kəs sevdiyini düşünə bilər, amma hər kəs sevməz. Çünki sevgi sadəcə hiss deyil, bir məsuliyyətdir, bir bağlılıqdır, bir inamdır. Hər ürək bu qədər incə, bu qədər saf bir duyğunu daşıya bilməz.

Bəzən insanlar deyir: “Niyə sevmirsən? Niyə sevilməyə şans vermirsən?” Amma heç kim bilmir ki, bəzən ürək özü də yorulur. Üzülür, qırılır, bağlanır və artıq seçici olur. Hər kəsə eyni dərəcədə dəyər verməz, hər kəsi içəri buraxmaz. Çünki ürək, sevilmədiyi yerləri tanımağı öyrənir. Və bu da onu qorumağın bir yoluna çevrilir.

Bəli, sevmək gözəldir. Amma kimə? Həqiqi, saf, dəyər verən və daşımağı bacaran birinə. Hər "salam" deyənə, hər “sevirəm” deyənə yox. Hər yaxınlaşana yol vermək, hər gələnə qapı açmaq, ürəyin dəyərini ucuzlaşdırmaqdır. Halbuki sevgi elə bir dəyərdir ki, onu hər könül dərk edə bilməz, hər nəfəs daşıya bilməz.

Unutma, sevmək bir cəsarətdir, sevilmək isə bir nemət. Amma hər insan bu nemətə layiq deyil. Ürəyini qorumaq da bir həyat müdrikliyidir. Çünki sevmək haqqdır, amma kimə veriləcəyini bilmək isə ağıldır.

“Hər kəs soruşur: Niyə həyatında kimsə yoxdur?"

Deyirlər: “Gözəl, baxımlı, ağıllı, xoş enerjili xanımsan… necə olur sən təksən və sol yanın boşdur?” 

Gülümsəyirəm. Cavabım sadədir: “Yer boşdur” deyə, ora hər kəsi oturtmaq olmaz.

Bu həyat, bu qəlb - sadəcə “kiməsə sahib olmaq” üçün açıq deyil. Qəlb bir saraydırsa, taxt da yalnız LAYİQ olana aiddir. Mən tək olmağı, yanlış biriylə birlikdə olub ruhumu itirməkdən üstün tuturam.

Hər sevgi qarşılıqlı görünə bilər, amma həqiqi bağ az tapılır. Mən nə kiminsə “vaxt keçirmə yeri”, nə də “yarımçıq sevgisinin tamamlama vasitəsi” olmaq istəmirəm. Mən - tamam biriyəm, yarım qalmış hekayələrə uyğun gəlmirəm.
Səssizliyimi təkliyimlə sevirəm, çünki bu təkliyin içində özüm varam, dəyərim var. Özümə hörmət etdiyim üçün hər ürəyə girmirəm, hər gözə gülmürəm, hər sözə aldanmıram.

Yalnız olmaq kədər deyil - seçimdir və mən, özümə layiq olmayan heç bir sevgiyə yer verməyəcək qədər güclü, şüurlu və dəyərli bir qadınam.

Unutma: Yer boşdur deyə, hər kəsi oturtmaq olmaz.  
Taxtına layiq olmayanı oturtma. Taxt düşündükləri qədər ucuz deyil!

Nazlı Onur