Bir klik, bir “bəyənmə” - bu qədər sadə görünür əslində. Amma bəzən bir “like” gerçək dünyada tənqidə, qısqanclığa, hətta zorakılığa səbəb ola bilir.

Son günlərdə Bakıda yaşanan hadisə - bir qadının, sevgilisinin sosial şəbəkədə başqa qadınların fotolarını bəyəndiyinə görə onu döyməsi - cəmiyyətimizdə münasibət anlayışına, sərhədlərə və inamsızlığa ciddi suallar doğurur.

Sosial media - vitrinlər qədər cazibədar, labirint qədər dolaşıq bir aləmdir. Orada hər klik, hər şərh, hər bəyənmə müəyyən mənalar doğurur. Bəziləri üçün bu, sadəcə bir jestdir. Digərləri üçün isə xəyanətin virtual ayaq səsləridir.

Əsl problem isə münasibətlərin mahiyyətindədir. Əgər iki insan arasında inam yoxdursa, bir “like” belə dağıdıcı olur. Əgər emosional sağlamlıq yoxdursa, sevgidən çox nəzarət, hörmətdən çox mülkiyyət hissi üstün gəlir. Halbuki sevgi nə zorlamaqdır, nə də əzmək. Sevgi - sərhəd tanıyan azadlıqdır.

Bu hadisə təkcə bir sosial media “like”ı deyil, münasibətlərdə güvən, hörmət və şəxsi sərhədlərin nə qədər vacib olduğunu bir daha göstərir. İnsan sevdiyini nəzarətə almaz, ona güvənər. Və ən əsası zorakılıq heç bir halda məqbul deyil, sevgi adı altında belə.

Unutmayaq: bir “bəyənmə” münasibəti dağıtmaz, amma güvənsizlik və aqressiya hər şeyi alt-üst edə bilər!

Nazlı Onur