Azərbaycan tarixinə qızıl hərflərlə yazılmış, həm hüznü, həm də qüruru özündə daşıyan bir gündür - 27 Sentyabr. 
2020-ci ilin məhz bu günü Ermənistanın genişmiqyaslı təxribatlarına cavab olaraq, Azərbaycan Ordusu Vətən Müharibəsinə başladı. Bu müharibə 44 gün sürdü və Azərbaycanın tarixi zəfəri ilə başa çatdı.

Ancaq bu zəfər asan başa gəlmədi. Minlərlə igidsimətli Vətən övladı şəhidlik zirvəsinə ucaldı. Hər biri torpağın deyil, xalqın qəlbində əbədi yaşamaq haqqını qazandı.

27 Sentyabr - Anım Günü yalnız bir tarix deyil, bu gün şəhidlərin ruhuna ehtiramın, birlik və bərabərliyin, torpaq sevgisinin və millət ruhunun simvoludur. Hər il bu tarixdə bütün Azərbaycan xalqı başı dik, qürurla şəhidlərini anır, onların nurlu xatirəsini yad edir.

Bu gün məktəblərdə, universitetlərdə, dövlət qurumlarında və bütün ölkə boyunca şəhidlərin xatirəsi bir dəqiqəlik sükutla anılır, onların ruhuna dualar oxunur. Şəhid ailələri, qazilər və Vətən müharibəsi iştirakçıları unudulmur, əksinə, xalqın ən ali dəyərləri kimi uca tutulur.

Vətən Müharibəsi Azərbaycanın yalnız torpaqlarını deyil, eyni zamanda milli qürurunu, birliyini və gücünü də geri qaytardı. Şəhidlərin qanı ilə yazılan bu tarix, gələcək nəsillərə vətənə necə sahib çıxmağın canlı dərsidir.

Biz bu gün şəhidlərimizi anmaqla yanaşı, onlara bir söz də veririk:  
“Siz unudulmadınız, heç vaxt da unudulmayacaqsınız.”

Qoy bu torpaqda hər bir addım atdıqca, şəhidlərin ayaq izləri, hər baxışda onların qoruduğu səma və hər nəfəsdə onların ruhu hiss olunsun.

Ruhunuz qarşısında baş əyirik!  
Yaşasın Azərbaycan!  
Qarabağ Azərbaycandır!🇦🇿

Nazlı Onur