5 oktyabr dünyada və ölkəmizdə Müəllimlər Günü kimi qeyd olunur. Bu gün təkcə bir peşə bayramı deyil, bir millətin taleyinə işıq salan, gələcəyini formalaşdıran insanlara göstərilən böyük hörmətin və ehtiramın ifadəsidir.

Müəllim təkcə sinif otağında deyil, həyatda da örnəkdir…

Müasir dövrdə informasiya sürətlə dəyişir, texnologiya həyatımıza yön verir. Lakin dəyişməyən bir dəyər var -müəllimin rolu. Süni intellekt, onlayn təhsil və digər yeniliklər bəlkə də bilik ötürməni asanlaşdırır, amma sevgi ilə öyrətmək, ruhla tərbiyə vermək yalnız müəllimə məxsus bir bacarıqdır.

Müəllimlər uşaqlara sadəcə faktları öyrətmir, onlara insan olmağı, vətəni sevməyi, əmək və zəhmətin dəyərini anlatırlar. Çətinliklərlə üzləşsələr də, yenə də sabahın böyük insanlarını yetişdirməyə davam edirlər. Bu, qəhrəmanlıqdır -səssiz, göstərilməyən, lakin cəmiyyətin inkişafında əsas rol oynayan qəhrəmanlıq.

Hər uğurlu həkimin, mühəndisin, jurnalistin, prokurorun arxasında bir müəllim dayanır…

Bəzən unuduruq -biz harada olsaq da, hansı pilləyə çatsaq da, bu yolun başlanğıcı məktəb partasından, müəllimin səsindəki istilikdən başlayır. Məni yazmağa, düşünməyə, soruşmağa ruhlandıran müəllimlərimin hər biri bu gün qəlbimdədir. Əgər bir jurnalist kimi cəmiyyətə az da olsa işıq sala bilirəmsə, bu işığın ilk çırağını yandıran onlar olub.
Bu müqəddəs peşəni sevərək və məsuliyyətlə yerinə yetirən hər bir müəllimi təbrik edirəm. İstər kənd məktəbində, istər şəhər liseyində - fərqi yoxdur, onların əməyi eyni dərəcədə müqəddəs və əvəzsizdir.

Müəllimlərə yalnız bu gün deyil, hər gün hörmət borcluyuq. Onların qarşısında baş əymək, cəmiyyət olaraq boynumuzun borcudur.

Cəmiyyətin qəlbini inşa edən müəllimlərimiz -bayramınız mübarək!

Nazlı Onur

5 oktyabr, 2025-ci il