18 oktyabr - Müstəqillik və Qürur Günü: Xudafərindən ucalan bayraq

Azərbaycan tarixində 18 oktyabr həm dövlətçilik, həm də hərbi zəfər baxımından xüsusi əhəmiyyətə malik bir gündür. 1991-ci ilin məhz bu tarixində Azərbaycan Respublikasının Ali Soveti “Azərbaycan Respublikasının Dövlət Müstəqilliyi haqqında Konstitusiya Aktı”nı qəbul edərək müstəqilliyini rəsmən bərpa etdi. Bu mühüm sənəd əsasında Azərbaycan, Sovetlər İttifaqının tərkibindən ayrılaraq yenidən öz suverenliyini elan etdi.

Bu tarixin bir başqa, xalqın yaddaşına həkk olunan parlaq hadisəsi isə 2020-ci ilin 18 oktyabrında baş verdi. İkinci Qarabağ müharibəsinin gedişində Müzəffər Azərbaycan Ordusu Xudafərin körpüsünə çatdı və qədim tarixə malik bu monumental abidə üzərində üçrəngli Azərbaycan bayrağı qürurla ucaldıldı. Bu görüntü təkcə zəfərin yox, həm də milli kimliyin, tarixi varlığın simvoluna çevrildi.

Xudafərin körpüsü - Araz çayı üzərində ucalan bu tarixi keçid, yüzillərlə Şərqlə Qərb arasında birləşdirici bir körpü rolunu oynayıb. Məhz bu körpü üzərində dalğalanan bayrağımız, azadlığımıza və torpaqlarımıza sahib çıxmağın simvolik təzahürü oldu.

Bu iki hadisənin eyni tarixə təsadüf etməsi isə tariximizin mistik gücünü göstərir: 1991-ci ildə bərpa olunan müstəqillik, 2020-ci ildə ordu gücü ilə möhkəmləndirildi. Xudafərində dalğalanan bayraq, dövlətçiliyimizin və suverenliyimizin sarsılmaz rəmzinə çevrildi.

Bu gün biz həm müstəqilliyimizin bərpasını, həm də Xudafərində qazanılan zəfəri qeyd edirik. Xalqımızın birliyi, əsgərimizin şücaəti və dövlətimizin gücü sayəsində tarix yazmağa davam edirik.

Üçrəngli bayrağımız daim yüksəklərdə dalğalansın!🇦🇿

Nazlı Onur

18 oktyabr, 2025-ci il