19 noyabr 2025-ci il tarixində Bakı şəhəri Türk Dövlətləri Təşkilatının (TDT) XI Zirvə Görüşündə təsdiqlənmiş Türk Qızıl Aypara Şəbəkəsinin (TQS) yüksək səviyyəli toplantısına ev sahibliyi edib. Toplantıda Azərbaycan, Türkiyə, Özbəkistan, Qazaxıstan və Qırğızıstanın Qızıl Aypara və Qızıl Ay cəmiyyətləri iştirak edib. Türkmənistan və Şimali Kipr Qızıl Ay cəmiyyətləri isə müşahidəçi qismində tədbirə qatılıb.

Tədbir proqramı ulu öndər Heydər Əliyevin Fəxri Xiyabanda məzarının, eləcə də ölkənin müstəqilliyi və ərazi bütövlüyü uğrunda canından keçmiş qəhrəmanların xatirəsinə ehtiram olaraq Şəhidlər Xiyabanı və Türk Şəhidliyinin ziyarəti ilə başlayıb.

Qeyd edək ki, TDT-yə üzv ölkələrin Qızıl Aypara cəmiyyətlərinin prezidentlər şurasının ilk iclası 12 noyabr 2025-ci ildə işə başlayıb və burada 2025–2026-cı illər üçün strateji fəaliyyət istiqamətləri müzakirə olunub. Həmçinin, ötən il Bişkekdə keçirilən toplantıda Türk dövlətlərinin Qızıl Aypara cəmiyyətləri tərəfindən “Qırmızı Şəbəkə” platforması təsis olunub və bu il Qırğızıstan Qızıl Aypara Cəmiyyəti tərəfindən başlanan fasilitasiya prosesinin genişləndirilməsinin Azərbaycanda davam etdirilməsi nəzərdə tutulub.

Toplantının əsas məqsədi TQS-in 2025-ci il fəaliyyətlərinin geniş təhlili, üzv milli cəmiyyətlər arasında humanitar əməkdaşlıq istiqamətində əldə olunan nəticələrin qiymətləndirilməsi, eləcə də 2026-cı il üzrə Fəaliyyət Planının müəyyənləşdirilməsi olub. Sessiyalar zamanı iştirakçılara həyata keçirilmiş layihələr, regional tərəfdaşlıq mexanizmləri və humanitar koordinasiya sahəsində görülmüş işlər barədə təqdimatlar edilib.

Tədbirin ikinci hissəsində 2026-cı il üçün uzunmüddətli hədəflər, prioritet fəaliyyət istiqamətləri və üzv cəmiyyətlərin birgə öhdəlikləri müzakirə olunub. Müzakirələr zamanı iqlim dəyişiklikləri, fəlakətə hazırlıq, rəqəmsallaşma, innovasiya və könüllülərlə iş kimi tematik istiqamətlərin növbəti ilin fəaliyyət planına inteqrasiyası barədə fikir mübadiləsi aparılıb. Bu istiqamətlər 2026-cı ildə Türkiyədə keçiriləcək TDT Zirvə Bəyannaməsinin humanitar bölməsinə töhfə verəcək.

Rəsmi açılışda Azərbaycan Qızıl Aypara Cəmiyyətinin prezidenti, millət vəkili Novruz Aslanov, Xarici İşlər Nazirinin müavini Samir Şərifov, TDT-nin Baş katibi Kubanıçbek Omuraliyev, Türkiyənin Kızılay rəhbəri Prof. Dr. Fatma Meriç Yılmaz, Qırğızıstan Qızıl Aypara Cəmiyyətinin prezidenti Çingiz Caliykov, Qazaxıstan Qızıl Aypara Cəmiyyətinin prezidenti Yerkeebat Argumbayev, Özbəkistan Qızıl Aypara Cəmiyyətinin rəhbəri Zafarcon Raxmanov, Türkmənistan nümayəndəsi Maral Açilova və Şimali Kipr Qızıl Ay Cəmiyyətinin prezidenti Sezai Sezen çıxış ediblər.

Daha sonra Türk Kızılayının nümayəndəsi Banu Ertuğrul tərəfindən 2025-ci il üzrə TQS İcmalı təqdim olunub. Türk Kızılayının Beynəlxalq Əlaqələr və Miqrasiya üzrə Baş direktoru Alper Küçük isə 2026-cı il Strateji Yol Xəritəsinə dair təqdimatla çıxış edib.

Tədbir üzv ölkələrin humanitar əməkdaşlıq və həmrəyliyini təsdiqləyən Türk Qızıl Aypara Şəbəkəsi Bəyannaməsinin imzalanması ilə başa çatıb. Sonda xatirə fotosu çəkilib və rəsmi hədiyyələr təqdim olunub.