24 dekabr - Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı İlham Əliyevin doğum günüdür.
Bu tarix müasir Azərbaycan dövlətçiliyinin inkişafı, möhkəmlənməsi və dünyada layiqli yerini tutması yolunda böyük xidmətləri olan bir liderin həyat yoluna nəzər salmaq üçün xüsusi əhəmiyyət daşıyır. İlham Əliyevin rəhbərliyi ilə Azərbaycan müstəqil, güclü və qalib dövlətə çevrilmişdir.
Prezident İlham Əliyev ulu öndər Heydər Əliyevin siyasi kursunu müasir dövrün tələblərinə uyğun şəkildə uğurla davam etdirərək ölkəmizin iqtisadi, siyasi və hərbi gücünü əhəmiyyətli dərəcədə artırmışdır. Onun qətiyyətli siyasəti nəticəsində Azərbaycan regionun lider dövlətinə çevrilmiş, beynəlxalq aləmdə söz sahibi olmuşdur.
Xüsusilə 2020-ci ildə qazanılan tarixi Zəfər xalqımızın yaddaşına qızıl hərflərlə yazıldı. 44 günlük Vətən müharibəsində Prezident İlham Əliyevin müdrik, uzaqgörən və prinsipial rəhbərliyi Azərbaycan Ordusunun gücünü, xalq - ordu - lider birliyinin sarsılmazlığını bütün dünyaya nümayiş etdirdi. Qarabağ torpaqlarımızın işğaldan azad edilməsi milli qürurumuzun, ədalətin və haqqın təntənəsi oldu.
Bu gün azad Qarabağda aparılan genişmiqyaslı quruculuq və bərpa işləri, köçkünlərin öz doğma yurdlarına qayıdışı, Azərbaycanın gələcəyə inamla addımlaması İlham Əliyevin strateji baxışının bariz nümunəsidir. Prezident hər zaman xalqına arxalanan, milli maraqları hər şeydən üstün tutan, dövlətin suverenliyini və ərazi bütövlüyünü qətiyyətlə qoruyan lider kimi tarixə düşmüşdür.
Bu əlamətdar gündə Azərbaycan xalqının Prezidenti, Müzəffər Ali Baş Komandan İlham Əliyevi səmimi-qəlbdən təbrik edir, ona möhkəm cansağlığı, uzun ömür, ali dövləti fəaliyyətində yeni-yeni uğurlar arzulayırıq.
Qoy Azərbaycan daim güclü, müstəqil və qalib olsun! 🇦🇿