Bloqer Nərmin Xudaverdiyevanın müraciəti əsasında başlanmış araşdırma yekunlaşıb

Bloqer Nərmin Xudaverdiyeva keçmiş sevgilisi Rüstəm Orucov tərəfindən həm sosial şəbəkələr vasitəsilə, həm də real həyatda təhdid və hədə-qorxuya məruz qaldığını bildirərək 2026-cı ilin yanvar ayında hüquq-mühafizə orqanlarına müraciət edib.

Müraciət əsasında məsələ Bakı şəhər Nərimanov Rayon Polis İdarəsi tərəfindən nəzarətə götürülüb və araşdırmalar aparılıb. Nərmin Xudaverdiyevanın verdiyi məlumata görə, polis orqanlarının operativ və obyektiv müdaxiləsi nəticəsində məsələ qısa müddətdə araşdırılıb.

Bildirilib ki, qarşı tərəf polis idarəsinə dəvət olunaraq araşdırmada iştirak edib, yol verdiyi səhvləri etiraf edib, Nərmin Xudaverdiyevaya və onun anasına üzrxahlığını bildirib.

Baş verənlərdən sonra tərəflər arasında yaranmış mübahisə aradan qaldırılıb və məsələ bağlanıb.

Nərmin Xudaverdiyeva qeyd edib ki, yaranmış vəziyyətin həllini nəzərə alaraq polisə etdiyi şikayəti geri götürüb. O, göstərilən diqqət və peşəkar yanaşmaya görə Azərbaycan Respublikasının Daxili İşlər Nazirliyinə, eləcə də Bakı şəhər Nərimanov Rayon Polis İdarəsinə təşəkkürünü bildirib.

Qeyd edək ki, hüquq-mühafizə orqanları tərəfindən vətəndaş müraciətlərinə operativ baxılması və qanunvericilik çərçivəsində tədbirlərin görülməsi istiqamətində işlər davam etdirilir.