Xocalı şəhərində Soyqırımı Memorial Kompleksinin açılışı Azərbaycan tarixində yaddaş və ədalətin vəhdətini nümayiş etdirən mühüm hadisə kimi qiymətləndirilir. Shir.az-a açıqlamasında Milli Məclisin deputatı Novruzəli Aslanov bildirib ki, bu mərasim Xocalı faciəsinin təkcə keçmişin ağrısı deyil, həm də gələcək nəsillər qarşısında daşıdığımız məsuliyyət olduğunu bir daha təsdiqlədi. Deputatın sözlərinə görə, Prezident İlham Əliyevin çıxışı dövlətin bu məsələdə prinsipial və ardıcıl mövqeyini açıq şəkildə ortaya qoydu.

Shir.az-a açıqlamasında Milli Məclisin deputatı Novruzəli Aslanov bildirib ki, Xocalı şəhərində Soyqırımı Memorial Kompleksinin açılışı Azərbaycan tarixində yaddaş və ədalət anlayışlarını bir nöqtədə birləşdirən mühüm hadisədir. Onun sözlərinə görə, bu mərasim bir daha təsdiqlədi ki, Xocalı faciəsi xalqımız üçün təkcə keçmişin ağrısı deyil, həm də gələcək nəsillər qarşısında daşıdığımız məsuliyyətdir.

Millət vəkili qeyd edib ki, Azərbaycan Respublikasının Prezidenti İlham Əliyev çıxışında bu məsuliyyətin dövlət səviyyəsində necə dərk olunduğunu və ardıcıl siyasi xətt üzərində qurulduğunu aydın şəkildə ifadə etdi. Çıxışda səsləndirilən fikirlər bir daha beynəlxalq ictimaiyyətə açıq mesaj oldu: Xocalıda baş verənlər sıradan müharibə faciəsi deyil, məqsədli şəkildə həyata keçirilmiş etnik nifrət aktıdır. Günahsız insanların qətlə yetirilməsi, ailələrin məhv edilməsi, uşaqların və qadınların amansızcasına öldürülməsi XX əsrin ən ağır cinayətlərindən biri kimi tarixdə qalır.

Deputat vurğulayıb ki, Azərbaycan cəmiyyəti bu vəhşiliyi törədənləri qətiyyətlə pisləyir və bu cinayətin arxasında dayanan Ermənistan dövlətinin məsuliyyətdən yayınmaq cəhdlərini rədd edir. Xocalı həqiqətləri nə qədər ört-basdır edilməyə çalışılsa da, zaman və faktlar həmişə ədalətin tərəfində olub.

Novruzəli Aslanov əlavə edib ki, dövlət başçısının çıxışında Xocalı həqiqətlərinin dünyaya çatdırılması istiqamətində aparılan mübarizə xüsusi yer tutdu. Onun sözlərinə görə, əgər Azərbaycan dövləti və cəmiyyəti bu məsələdə israrlı mövqe sərgiləməsəydi, beynəlxalq aləmdə saxta və təhrif olunmuş təsəvvürlər üstünlük qazana bilərdi.

Bu baxımdan Heydər Əliyev Fondunun fəaliyyəti xüsusi əhəmiyyət kəsb edir. Fondun təşəbbüsləri nəticəsində Xocalı faciəsi beynəlxalq platformalarda geniş şəkildə gündəmə gətirilib. Leyla Əliyevanın bu istiqamətdə apardığı sistemli fəaliyyət Azərbaycan həqiqətlərinin dünya ictimaiyyətinə çatdırılmasına mühüm töhfə verib.

Millət vəkili bildirib ki, Xocalının azad edilməsi, Qarabağda separatizmin aradan qaldırılması və hərbi cinayətlərdə iştirak etmiş şəxslərin məsuliyyətə cəlb olunması göstərdi ki, Azərbaycan dövləti öz xalqının haqqını yalnız tələb etmir, onu təmin edir. Azərbaycan Silahlı Qüvvələrinin qəhrəmanlığı və peşəkarlığı bu prosesdə əsas amil olub.

Deputatın sözlərinə görə, bu gün Xocalı torpağında ucaldılan memorial abidə şəhidlərin xatirəsinin əbədi yaşadıldığını, xalqın ağrısının unudulmadığını və dövlətin bu ağrını paylaşdığını nümayiş etdirir. Xocalı faciəsi xalqımızın ruhunu sındırmadı, əksinə, onu daha da möhkəmləndirdi. Məhz bu ruh, bu iradə və bu yaddaş sayəsində Xocalı həqiqətləri yaşayır və yaşayacaq.