Son günlər sosial şəbəkələrdə və mobil telefonlara göndərilən SMS bildirişlər vasitəsilə vətəndaşların aldadılması halları artmaqdadır. Mesajlarda guya nəqliyyat vasitələri üzrə inzibati cərimə borcu olduğu bildirilir və istifadəçilər saxta internet səhifələrinə yönləndirilir.

Shir.az xəbər verir ki, bununla bağlı Baş Dövlət Yol Polisi İdarəsi rəsmi müraciət yayıb.

Qurumun açıqlamasında qeyd olunur ki, vətəndaşlara göndərilən bu cür mesajlarda göstərilən internet səhifələrinin dövlət qurumları və rəsmi ödəniş sistemləri ilə heç bir əlaqəsi yoxdur. Saxta platformalardan biri kimi asanpayex.cc/az ünvanı göstərilib.

“Baş Dövlət Yol Polisi İdarəsi vətəndaşlara bildirir ki, qeyd olunan internet səhifəsinin dövlət qurumları və rəsmi ödəniş sistemləri ilə heç bir əlaqəsi yoxdur. Vətəndaşlardan xahiş olunur ki, bu kimi saxta səhifələrə etibar etməsin, şəxsi məlumatlarını və bank kartı məlumatlarını belə platformalarda paylaşmasınlar. İnzibati cərimələrlə bağlı məlumatların yoxlanılması və ödənişlərin həyata keçirilməsi yalnız rəsmi dövlət platformaları vasitəsilə aparılmalıdır”, – deyə müraciətdə vurğulanıb.

Qurum bir daha vətəndaşları diqqətli olmağa, naməlum keçidlərə daxil olmamağa və şübhəli hallarla rastlaşdıqda aidiyyəti qurumlara məlumat verməyə çağırıb.