Silahlı münaqişələr və vətəndaş müharibəsinin viran qoyduğu Sudanda 26 milyon insan aclıq çəkir. Bundan başqa, 750 min sudanlı bu fəlakətlə bağlı ölüm astanasındadır.

Shir.az xarici mediaya istinadla xəbər verir ki, bu məlumat BMT-nin hesabatında yer alıb.

BMT-nin sözçüsü Stefan Dujarrik Sudanda ərzaqla bağlı vəziyyətin pisləşməsindən narahatlığını bildirib. O, təşkilatın baş qərargahında keçirdiyi brifinqdə deyib: “Demək olar ki, 26 milyon kişi, qadın və uşaq kəskin aclıq içindədir. Misal üçün deyim ki, bu, Avstraliyanın bütün əhalisinə bərabərdir. Həmin 26 milyon insandan 750 min nəfər isə aclıqdan ölümün astanasındadır”.

Sudanda Suveren Şuranın rəhbəri general Əbdülfəttah əl-Burhanın rəhbərlik etdiyi ordu ilə onun keçmiş müavini Muhammed Həmdan Daqlonun rəhbərlik etdiyi yarımhərbi Çevik Dəstək Qüvvələri (RSF) arasında döyüşlər davam edir.

BMT-nin məlumatına görə, 2023-cü ilin aprelində başlayan münaqişədə ən azı 12 260 nəfər ölüb, 33 mindən çox insan yaralanıb. Təxminən 6,8 milyon insan Sudanda və ya qonşu ölkələrdə sığınacaq tapıb. Amma həmin ərazilərdə də humanitar böhran pisləşməkdə davam edir.

Səudiyyə Ərəbistanı və ABŞ-ın vasitəçiliyi ilə əldə edilmiş bir neçə atəşkəs razılaşması da bu ölkədə silahlı münaqişəyə son qoya bilməyib.