Anadolu işğalını davam etdirən Yunanıstan ordusu 1921-ci ilin 10 iyulundan Kütahya-Eskişehir döyüşlərinə başladı. Osmanlı-Türk ordusu Sakarya çayının şərqinə çəkildi.
Türkiyə Böyük Millət Məclisi Sakarya müharibəsinə hazırlıqlar üçün 5 avqustda Mustafa Kamal Paşanı hədsiz səlahiyyətlərə malik baş komandan elan etdi.
***
10 iyul 1985-ci ildə “Greenpeace” gəmisi Fransa Gizli Xidməti "Rainbow Warrior" (Göy qurşağı döyüşçüsü) agentləri tərəfindən Oklend (Auckland) limanında bombalanaraq batırıldı. İstintaq zamanı Fransa təxribatı öz agentlərinin törətdiyini qəbul etdi.
***
Panama diktatoru Manual Norieqa ABŞ hökuməti tərəfindən tutulduqdan sonra çıxarıldığı məhkəmədə narkotik ticarəti maddəsilə 40 illik həbsə məhkum olundu (1992).
***
10 iyulda həm də bu tarixi şəxsiyyətlər xatırlanır.
Azərbaycanın görkəmli maarifçi şairi Seyid Əzim Şirvani 1835-ci ilin bu günü dünyaya gəlib. İlk şeirlərini 20 yaşında (1855) yazıb. Bağdada və Misirə səfər edib, dövrün tanınmış alim və şairləri ilə görüşüb.
Seyid Əzim Şirvaninin qəzəlləri, lirik və satirik şeirləri 19-cu əsrAzərbaycan poeziyasının incilərindəndir.
S.Ə.Şirvani 1869-cu ildə Şamaxıda yeni tədris prinsiplərinə əsaslanan məktəb açıb. Mirzə Ələkbər Sabir və Sultan Məcid Qənizadə də ibtidai təhsillərini həmin məktəbdə alıblar. (1835-1888)
***
Hərbi xadim, Azərbaycan Demokratik Cümhuriyyəti ordusunun general-mayoru Əbdülhəmid Qaytabaşı 1884-cü il 10 iyulda anadan olub.
1918-ci ildə müdafiə naziri Səməd bəy Mehmandarovun əmri ilə qərargahın tərkibindəki növbətçi general vəzifəsinə təyin olunan, 1919-cu ildə Müvəqqəti Ümumi Qərargahın rəisi vəzifəsini icra edən Ə.Qaytabaşı Aprel işğalından sonra bolşeviklər tərəfindən güllələnib. (1884-1920)
***
Tanınmış şərqşünas alim və filosof Aleksandr Makovelski1884-cü il iyulun 10-da anadan olub. 1945-1950-ci illərdə Azərbaycan Elmlər Akademiyası Fəlsəfə İnstitutunun direktoru vəzifəsini icra edib.
Aleksandr Makovelskinin “Nizami və onun Şərqdə rolu” adlı böyük fəlsəfi əsəri təkcə Azərbaycan deyil, Avropa və Amerikada da yüksək qiymətləndirilib. (1884-1969)
***
Azərbaycan aşıq sənətinin görkəmli nümayəndələrindən olan Xəstə Bayraməli 1899-cu ilin bu günü Göyçə mahalının Nərimanlı kəndində doğulub.
Yaradıcılığa erkən yaşlarından başlayan Bayraməli epik-lirik poema səpkili hekayətləri, qəzəlləri, beşlikləri, doqquzluqları ilə aşıq sənətinə orijinal bir üslub gətirib.
Xəstə Bayraməli yazılı ədəbiyyatla şifahi xalq ədəbiyyatı arasında bir növ körpü yaradıb. Onun yaradıcılığında vətənpərvərlik motivləri son dərəcə güclüdür. (1899-1952)
***
Görkəmli ingilis yazıçısı Ceyms Oldric 1918-ci ilin 10 iyulunda anadan olub. İkinci Dünya Müharibəsi illərində müxbir kimi çalışıb.
Ceyms Oldric Yaxın Şərq xalqlarının milli azadlıq hərəkatından, müstəmləkə siyasətinə qarşı mübarizələrdən bəhs edən “Diplomat”, “Əli silahlılar”, “Qafqaz haqqında nəğmə” və başqa əsərlərin müəllifidir. (1918-2002)
***
Livan əslli misirli məşhur kino aktyoru Ömər Şərif 2015-ci ilin bu günü 83 yaşında keçirdiyi infarkt nəticəsində həyatını itirib. (1932-2015)
