Türkiyə Prezidenti Rəcəb Tayyib Ərdoğan 1995-ci ildə Bosniyanın Srebrenitsa şəhərində baş vermiş faciəni bəşər tarixində “qara ləkə” adlandırıb və belə hadisələrin təkrarlanmasının yolverilməz olduğunu vurğulayıb.

Shir.az xəbər verir ki, bu barədə Türkiyə liderinin Srebrenitsa soyqırımının 29-cu ildönümünə həsr olunmuş anım mərasiminin iştirakçılarına videomüraciətində deyilir.

“Bu cür vəhşiliklər dünyanın heç bir yerində baş verməməlidir. Biz bu faciəni unutmayacağıq və Srebrenitsanın unudulmasına imkan verməyəcəyik”, -deyə dövlət başçısı əmin edib.

Türkiyə Prezidenti Bosniya və Herseqovina sakinlərinə başsağlığı verib, beynəlxalq məhkəmənin hökmünə baxmayaraq, hələ də soyqırımı faktını dananların, hərbi cinayətləri təşviq edənlərin olduğunu qeyd edib. “Bütün bunlar dərin təəssüf hissi doğurur”, -deyə siyasətçi vurğulayıb.

Ərdoğan müharibədən sonrakı dövrdə Balkan ölkəsində öz ata-baba yurdlarına qayıdan insanların hüquqlarının pozulmasına da diqqət çəkib. “Etnik mənsubiyyətindən asılı olmayaraq, Bosniya və Herseqovina sakinləri özlərini təhlükəsiz hiss etməlidirlər”, –deyə Türkiyə Prezidenti bildirib.

Türkiyə lideri vurğulayıb ki, Ankara Bosniya və Herseqovinada sabitliyin və sülhün təmin edilməsi üçün mümkün addımlar atmağa davam edəcək. “Bütün tərəflər ölkədə münaqişələrin və artan gərginliyin mənfi nəticələrindən xəbərdar olmalıdır. Türkiyə Bosniya və Herseqovinanın ərazi bütövlüyünü, siyasi birliyini və suverenliyini tam dəstəkləyir”, - deyə Ərdoğan bildirib.