Azərbaycanda qadın olmaq çətindir, lakin boşanmış qadın olmaq - ikiqat mübarizə deməkdir. 

Azərbaycanda qadın olmaq, xüsusən də boşanmış bir qadın kimi həyatına davam etmək çox çətin və bəzən ədalətsiz olur. Boşanmış qadınlara qarşı cəmiyyətin sərt baxışları, etiketləmələr və laqeyd münasibətlər onların həyat yükünü daha da ağırlaşdırır.

Onlar təkcə ailə dağılmasının travması ilə deyil, həm də cəmiyyətin qərəzli münasibəti ilə üzləşirlər. Halbuki boşanmaq nə ayıb, nə də günahdır - bu, iki insanın birgə yaşaya bilmədiyini qəbul etməsidir. Lakin bizdə qadın boşanıbsa, dərhal ona “problemli” damğası vurulur, halbuki eyni vəziyyətdə olan kişi cəmiyyət tərəfindən “azad” və ya “yeni həyata başlamağa hazır” kimi qəbul edilir.

Boşanmış qadınlar həm ata, həm ana olurlar. Həyat yükünü təkbaşına daşıyırlar, lakin buna baxmayaraq, onlara güvənsizliklə, şübhə ilə baxılır. Halbuki onlar çox zaman ailəni qorumağa çalışan, səbr edən, sonda məcbur qalıb bu yolu seçən tərəf olurlar.

Ən acısı isə odur ki, qadını anlayacaq, dəstək olmalı olan insanlar - qadınlar belə çox zaman bir-birinə qarşı anlayışsız olur. Amma qadın bir cəmiyyətin əsas sütunudur. Boşanmış qadın da bu cəmiyyətin içində qürurla, ləyaqətlə yaşamaq haqqına sahibdir və bu haqqı heç kim ona çox görməməlidir!

Cəmiyyətimizdə həqiqətən də taleyi gətirməyən, həyatında zərbə alan qadınlara qarşı çox ədalətsiz münasibət var. Hər cür oyundan çıxan ( iraq yaxşılardan) ailə qurmaq üçün doğru-dürüst dəyər verməyən “qız”ları asanlıqla alıb arvad edirsiniz, amma boşanmış qadına başqa gözlə baxırsınız. Sanki boşanmaq onun ən böyük günahı, qəbahətiymiş kimi.

Unutmayın ki, heç kim sığortalanmayıb bu həyat dərdindən. Bu sizin ailənizin, bacınızın, gələcəkdə qızınızın da başına gələ bilər. Kiminsə taleyi pisə döndüyündə, ona anlayışla, dəstəklə yanaşmaq insanlıq borcudur, yoxsa qınamaq, damğalamaq yox.

Boşanmış qadınların həyatını çətinləşdirən, onları cəmiyyətdən təcrid edən, aşağılayan münasibətlər yox, sevgi, hörmət və anlayış olmalıdır. Hər bir qadın - boşanmış da olsa, təkrar xoşbəxt olmağa, hörmətlə yaşamağa layiqdir.

Qadın özünə dəyər verirsə, sərhədlərini qoruyursa, kiməsə asanlıqla güvənmirsə, dərhal ona “dik baş” və ya “yekəxana” damğası vurulur. Amma əgər asanlıqla hər kəsə güvənər, səmimiyyətini paylaşar, üzünə gülərsə, onu da “quşbeyin” adlandırırlar. Bu, cəmiyyətin acı reallığıdır - qadın nə etsə, yenə qınanır.

Mən isə deyirəm ki, təkliyi seçmək, özünə hörmət etmək, düzgün münasibət üçün gözləmək heç də zəiflik deyil. Xüsusilə boşanmış və iki uşaq anası olaraq sən bu seçiminlə həm gücünü, həm də əzmini göstərirsən.

Bəzi kişilərə isə - əgər başa düşmürsünüzsə, yanımızda oynamağa ehtiyac yoxdur. Gedin öz dünyanızda qalın…

Əsl kişi - keçmişə deyil, insanın özünə baxandır. Boşanmış qadına sevgi ilə yanaşan, onun yaralı qəlbinə məlhəm olan, “mən burdayam” deyib sözünü əməli ilə sübut edəndir.  
Qorxmadan yanında duran, keçmişini deyil, gələcəyini düşünəndir.
Çünki kişi olmaq - yalnız cins deyil, duruş məsələsidir!

Qadınlar, güclü olun, özünüzə qiymət verin! Başqalarının düşüncələri sizi yoldan çıxarmasın!

Unutmayaq: Hər bir qadın - güclü, dəyərli və hörmətə layiqdir!

Nazlı Onur