15 Sentyabr - “Bilik Günü” münasibətilə Konstitusiya və Suverenlik ili çərçivəsində Nərimanov rayonu 39 saylı məktəbdə genişmiqyaslı tədbir keçirilib. Tədbirdə Milli Qəhrəman Rafiq Nəsrəddinovun qardaşı Mehdi Nəsrəddinli, Nərimanov Rayon İcra Hakimiyyətinin nümayəndəsi Nicat Məmmədov, Nərimanov Rayon Ağsaqqallar Şurasının sədr müavini Yamil Əliyev, məktəbin məzunu, Dənizçilik Akademiyasının müəllimi, fəlsəfə doktoru Hacı müəllim iştirak ediblər.

Tədbir Azərbaycan Respublikasının Dövlət Himninin səsləndirilməsi və Vətən uğrunda canından keçmiş şəhidlərimizin, o cümlədən Ümummilli lider Heydər Əliyevin əziz xatirəsinin bir dəqiqəlik sükutla yad edilməsi ilə başlayıb.

Məktəbin direktoru Tahirə Şükürova tədbiri giriş sözü ilə açaraq şagirdləri, müəllimləri və valideynləri yeni dərs ili münasibətilə təbrik edib. O, çıxışında Bilik Gününün yalnız yeni tədris ilinin başlanğıcı deyil, həm də elm, maarif və inkişaf yolunda yeni hədəflərin müəyyənləşdirildiyi mühüm bir gün olduğunu bildirib.

“Valideynlərimizə göstərdikləri diqqət və dəstəyə görə təşəkkür edir, şagirdlərimizə isə əzmlə oxumağı və biliklərlə silahlanaraq arzularına qovuşmağı arzulayıram. Ümid edirəm ki, qarşıdan gələn dərs ili hər birimiz üçün uğurlu, məhsuldar və xoş nəticələrlə yadda qalacaq,” - deyə məktəb direktoru vurğulayıb.

Tədbir məktəbin şagirdlərinin iştirakı ilə hazırlanan bədii hissə ilə davam edib.

Nazlı Onur