Bu gün Azərbaycan Respublikasının Milli Qəhrəmanı, cəsur jurnalist, “Molodyoj Azerbaydjana” qəzetinin müxbiri olmuş Salatın Əsgərovanın anım günüdür.

Shir.az olaraq Salatın Əsgərovanın əziz xatirəsini dərin hörmət və ehtiramla yad edirik.

Xatırladaq ki, Salatın Əziz qızı Əsgərova 16 dekabr 1961-ci ildə Bakı şəhərində ziyalı ailəsində anadan olub. 1979-cu ildə Bakı şəhərində Mikayıl Müşfiq adına 18 saylı orta məktəbi əla qiymətlərlə bitirib və həmin il Azərbaycan Neft və Kimya İnstitutuna daxil olub.

1984-cü ildə geofizika ixtisası üzrə mühəndis diplomu alan Salatın Əsgərova jurnalistika sahəsinə böyük maraq göstərib. Elə həmin ildən müqavilə əsasında “Bakı” qəzetində fəaliyyətə başlayıb, dörd il sonra isə “Molodyoj Azerbaydjana” qəzetində müxbir kimi çalışıb.

Salatın Əsgərovanın qələmə aldığı mövzular əsasən Azərbaycanın ərazi bütövlüyü, Qarabağ həqiqətləri ilə bağlı olub. O, tez-tez cəbhə bölgələrinə, Qarabağın qaynar nöqtələrinə gedərək operativ və cəsarətli reportajlar hazırlayıb.

Jurnalistin sonuncu yazısı Xocalıda fəaliyyət göstərən xüsusi təyinatlı polis dəstəsinin ağır döyüş şəraitindən bəhs edən “Omonçular” adlı məqalə olub. 1991-ci il yanvarın 9-da Salatın Əsgərovanın da olduğu avtomobil Laçın rayonunun Qaladərəsi kəndi yaxınlığında erməni terrorçuları tərəfindən mühasirəyə alınıb və yaxın məsafədən açılan güclü atəş nəticəsində o, amansızcasına qətlə yetirilib.

Salatın Əsgərova Bakı şəhərində, Şəhidlər xiyabanında dəfn olunub. 6 noyabr 1992-ci ildə ona ölümündən sonra “Azərbaycanın Milli QəhrəQələmi ilə cəbhədə döyüşən jurnalist: Salatın Əsgərovanın əziz xatirəsi anılırmanı” fəxri adı verilib. Qeyd edək ki, Salatın Əsgərova Azərbaycanın ilk şəhid qadın jurnalistidir.

Salatın Əsgərova ailəli olub. Bu evlilikdən bir oğlu - Ceyhun Əsgərov dünyaya gəlib. Ceyhun Əsgərov da jurnalist peşəsini seçərək anasının yolunu davam etdirir.

Allah rəhmət eləsin. Xatirəsi daim qəlbimizdə yaşayacaq.Qələmi ilə cəbhədə döyüşən jurnalist: Salatın Əsgərovanın əziz xatirəsi anılır