Daxili İşlər Nazirliyinin Baş Dövlət Yol Polisi İdarəsinin (BDYPİ) İctimaiyyətlə əlaqələr üzrə rəisi Toğrul Nəsirli 20 Yanvar - Ümumxalq Hüzn Günü ilə əlaqədar paytaxtın bir sıra küçə və prospektlərində nəqliyyatın hərəkətinə məhdudiyyət qoyulacağını bildirib.

Onun sözlərinə görə, yanvarın 20-də səhər saat 08:00-dan etibarən mərasim başa çatanadək Parlament prospekti ilə kəsişən və birləşən küçələrdə avtomobillərin hərəkəti tam məhdudlaşdırılacaq. Məhdudiyyət 20 Yanvar faciəsi qurbanlarının xatirəsini yad etmək üçün Şəhidlər xiyabanına üz tutan vətəndaşların rahat, fasiləsiz və təhlükəsiz hərəkətinin təmin olunması məqsədi daşıyır.

Bu çərçivədə Mikayıl Müşfiq küçəsi ilə Hüseyn Cavid prospektinin kəsişməsindən, Mikayıl Müşfiq dairəsi ilə Mətbuat prospektinin kəsişməsindən, Mehdi Hüseyn küçəsindən, Teleteatr binasının qarşısından, eləcə də İzzət Nəbiyev və Abbasqulu Abbaszadə küçələrinin kəsişməsindən - Milli Məclisin inzibati binasının arxa hissəsindən Parlament prospekti–Şəhidlər xiyabanı istiqamətində bütün nəqliyyat vasitələrinin hərəkəti məhdudlaşdırılacaq və alternativ istiqamətlərə yönləndiriləcək.

BDYPİ vətəndaşlara bu istiqamətdə şəxsi avtomobillərdən mümkün qədər az istifadə etməyi, ictimai nəqliyyata üstünlük verməyi tövsiyə edir.