ABŞ-ın Vitse-prezidenti Cey. Di. Vensin Azərbaycana rəsmi səfəri və Strateji Tərəfdaşlıq haqqında Xartiyanın imzalanması iki ölkə münasibətlərində keyfiyyətcə yeni mərhələnin başlanğıcı kimi dəyərləndirilə bilər. Bu hadisə təkcə diplomatik protokol çərçivəsində baş tutmuş görüş deyil, Cənubi Qafqazda formalaşan yeni geosiyasi reallıqlar fonunda Azərbaycanın artan rolunun beynəlxalq səviyyədə təsdiqidir.
Shir.az xəbər verir ki, bu fikirləri aia.az-a açıqlamasında Milli Məclisin deputatı Novruzəli Aslanov deyib.
Deputat bildirib ki, Prezident İlham Əliyev mətbuata bəyanatında ABŞ administrasiyasının ölkəmizə göstərdiyi müsbət münasibəti xüsusi vurğulayaraq, imzalanan sənədin altı aylıq intensiv işin nəticəsi olduğunu qeyd edib. Onun sözlərinə görə, Vaşinqtonda başlanan dialoqun Bakı mərhələsində konkret siyasi sənədlə möhkəmləndirilməsi tərəflərin strateji baxışlarının üst-üstə düşdüyünü göstərir.
Millət vəkili əlavə edib ki, Xartiyanın əsas müddəalarından biri kimi tərəflərin bir-birinin suverenliyini, ərazi bütövlüyünü və sərhədlərinin toxunulmazlığını bir daha təsdiqləməsi xüsusi siyasi məna daşıyır:
“Bu prinsipial yanaşma regionda uzun illər davam etmiş münaqişə mərhələsindən sonra formalaşan sülh arxitekturasına güclü beynəlxalq dəstək deməkdir. ABŞ kimi qlobal gücün bu mövqeni açıq şəkildə ifadə etməsi Azərbaycanın haqlı mövqeyinin diplomatik müstəvidə daha da möhkəmlənməsinə xidmət edir. Eyni zamanda, təhlükəsizlik və antiterror əməkdaşlığının genişləndirilməsi barədə razılaşmalar Cənubi Qafqazın sabitlik zonasına çevrilməsi baxımından mühüm əhəmiyyət kəsb edir”.
Novruzəli Aslanov vurğulayıb ki, Xartiyanın Təhlükəsizlik Əməkdaşlığı bölməsində müdafiə sahəsində əməkdaşlığın genişləndirilməsi niyyətinin ifadə olunması tərəfdaşlığın formal xarakter daşımadığını, real mexanizmlərlə təmin olunacağını göstərir. Bu isə Azərbaycanın beynəlxalq təhlükəsizlik sistemində etibarlı tərəfdaş kimi rolunu daha da gücləndirir.
Deputatın sözlərinə görə, vitse-prezidentin səfəri Azərbaycanın uğurlarını həzm edə bilməyən və müxtəlif siyasi təzyiq mexanizmlərindən istifadə etməyə çalışan bəzi dairələrə də tutarlı cavabdır:
“ABŞ-ın ən yüksək siyasi rəhbərliyinin Bakıya səfəri və strateji sənədin imzalanması göstərir ki, Azərbaycanla əməkdaşlıq praqmatik maraqlara və qarşılıqlı hörmətə əsaslanır. Bu səfər Azərbaycanın regional güc statusunun beynəlxalq səviyyədə qəbulunun növbəti təsdiqi olmaqla yanaşı, ölkəmizin müstəqil və balanslaşdırılmış xarici siyasət kursunun uğurunu nümayiş etdirir”, – deyə deputat fikirlərini tamamlayıb.
