“Fevralın 15-də Belqradda Azərbaycan–Serbiya Strateji Tərəfdaşlıq Şurasının ilk iclası keçirildi. Bu tədbirin nəticələri iki ölkə arasındakı tərəfdaşlıq əlaqələrinin iqtisadi və investisiya baxımından yeni mərhələyə qədəm qoyduğunu aşkar nümayiş etdirdi”.

Bu sözləri aia.az-a verdiyi açıqlamasında Milli Məclisin deputatı Novruzəli Aslanov deyib.

Shir.az xəbər verir ki, millət vəkili bildirib ki, iclasda çıxış edən Azərbaycan Prezidenti İlham Əliyev iqtisadi əməkdaşlıq sahəsinə xüsusi diqqət ayıraraq ticarət və investisiya əlaqələrinin strateji prioritet kimi müəyyənləşdirildiyini vurğulayıb. Deputatın sözlərinə görə, dövlət başçısının birgə inşa ediləcək elektrik stansiyasını nümunə göstərməsi iqtisadi əməkdaşlığın yalnız xammal ixracı ilə məhdudlaşmadığını, yüksək əlavə dəyər yaradan layihələr vasitəsilə daha dərin tərəfdaşlığa çevrildiyini göstərir.

Novruzəli Aslanov qeyd edib ki, bu yanaşma enerji sektorunda qazın elektrik enerjisinə çevrilməsi və ixrac imkanlarının genişləndirilməsi ilə bağlı strateji planların reallaşdırılması deməkdir. Eyni zamanda, layihələr Azərbaycanın Serbiyaya və Balkan regionuna texnoloji və iqtisadi təsirinin artmasına xidmət edir.

Millət vəkili birgə bəyanatda iqtisadi komissiyaların fəaliyyətinin gücləndirilməsi və qarşılıqlı investisiya imkanlarının artırılmasının xüsusi vurğulanmasını da önəmli məqam kimi dəyərləndirib. Onun sözlərinə görə, bu mexanizm layihələrin sürətli icrasına, investisiyaların şəffaf və davamlı olmasına şərait yaradır.

Deputat əlavə edib ki, nəqliyyat və logistika sahəsində əməkdaşlıq iqtisadi tərəfdaşlığın mühüm elementidir. Azərbaycanın tranzit imkanları və Serbiyanın coğrafi mövqeyi inteqrasiya edilmiş logistik şəbəkənin qurulmasına töhfə verir ki, bu da regional ticarət dövriyyəsinin artmasına zəmin yaradır.

“Belqraddakı iclas iqtisadi əməkdaşlığın davamlılığını təmin etmək üçün qarşılıqlı strateji planların hazırlanmasının vacibliyini də ortaya qoydu. Nümayəndə heyətləri razılaşdırılmış məsələləri qısa müddətdə həyata keçirməyə hazır olmalıdır. Bu, tərəfdaşlığın praktik nəticələrlə təsdiqlənəcəyini göstərir”, – deyə Novruzəli Aslanov vurğulayıb.

Sonda deputat bildirib ki, Azərbaycan–Serbiya Strateji Tərəfdaşlıq Şurasının açılışı iqtisadi inteqrasiyanın və investisiya əməkdaşlığının yeni standartını müəyyən edir. Energetika, nəqliyyat və birgə sənaye layihələri tərəfdaşlığı həm iqtisadi, həm də strateji baxımdan möhkəmləndirir.