Fevralın 19-da Milli Məclisin deputatları Tamam Cəfərova, Şahin Seyidzadə, Elçin Mirzəbəyli və Novruzəli Aslanov **Azərbaycan Dövlət Pedaqoji Universitetinin Şamaxı filialı**nda “İnsan kapitalının inkişafında gənclərin rolu” mövzusunda tələbələrlə görüş keçiriblər.

Bu barədə Shir.az-a açıqlamasında Milli Məclisin üzvü Novruzəli Aslanov məlumat verib.

Deputat bildirib ki, görüş onda xoş və qürurverici təəssüratlar yaradıb. Onun sözlərinə görə, tədbirdən əvvəl filialın şəhid-məzunlarının xatirəsinə ucaldılmış abidə ziyarət olunub.

“Bu an bir daha göstərdi ki, bugünkü Azərbaycan gəncliyi həm Vətənə sədaqəti, həm də gələcəyə inamı özündə birləşdirən möhkəm mənəvi dayaqlara sahibdir”, – deyə deputat qeyd edib.

Görüş zamanı filialda yaradılmış müasir tədris infrastrukturu, akademik və psixoloji mühitlə tanışlıq da olub. Vurğulanıb ki, bu şərait gənclərin hərtərəfli inkişafına göstərilən dövlət qayğısının bariz nümunəsidir.

Tədbirin rəsmi hissəsində filialın direktoru, dosent Tünzalə Yusifova çıxış edərək Ulu Öndər Heydər Əliyevin gənclərlə bağlı strateji baxışının bu gün Prezident İlham Əliyev tərəfindən uğurla davam etdirildiyini diqqətə çatdırıb. Qeyd olunub ki, insan kapitalının əsasını savadlı, dünyagörüşlü və milli dəyərlərə bağlı gənclər təşkil edir.

Deputat əlavə edib ki, tələbələrlə dialoq zamanı onların sərbəst düşünməsi, məqsədyönlü sualları və gələcəyə dair aydın planları Azərbaycan gəncliyinin potensialını bir daha nümayiş etdirib.

“Belə düşünən, təşəbbüskar və məsuliyyətli gənclik Azərbaycanın insan kapitalının ən etibarlı təminatıdır. Regionlarda formalaşan intellektual potensial ölkəmizin gələcək inkişafının əsas dayaqlarındandır”, – deyə Novruzəli Aslanov vurğulayıb.