Martın 3-də Bakı Konqres Mərkəzində keçirilən Cənub Qaz Dəhlizi Məşvərət Şurasının 12-ci iclası bir daha təsdiqlədi ki, enerji artıq təkcə iqtisadi deyil, həm də geosiyasi sabitliyin əsas sütunlarından biridir. On iki il əvvəl əsası qoyulan təşəbbüsün bu günədək davamlı və effektiv platforma kimi fəaliyyət göstərməsi Azərbaycanın strateji baxışının düzgünlüyünü ortaya qoyur. İlkin mərhələdə dialoq və qarşılıqlı etimad mexanizmi kimi formalaşan bu format hazırda Avrasiyanın enerji təhlükəsizliyinin mühüm koordinasiya mərkəzinə çevrilib.
Bu fikirləri Shir.az-a açıqlamasında Milli Məclisin deputatı Novruzəli Aslanov səsləndirib.
Millət vəkili vurğulayıb ki, Prezident İlham Əliyev çıxışında zaman keçdikcə birgə müzakirələrin əhəmiyyətinin daha aydın göründüyünü xüsusi qeyd edib. Deputatın sözlərinə görə, son illərdə qlobal enerji bazarında müşahidə olunan dalğalanmalar və təchizat zəncirlərində yaranan qırılmalar sabit və etibarlı tərəfdaşlıq mexanizmlərinin vacibliyini açıq şəkildə nümayiş etdirib. Azərbaycan isə bu prosesdə etibarlı təchizatçı statusunu daha da möhkəmləndirib.
Novruzəli Aslanov bildirib ki, ölkəmizin təbii qaz ixrac etdiyi dövlətlərin sayının artması Azərbaycana olan siyasi etimadın bariz göstəricisidir: “Əgər 12 il əvvəl Azərbaycan qazı 12 ölkəyə çatdırılırdısa, bu gün həmin coğrafiya 16 dövləti əhatə edir. Bu, sadəcə statistik artım deyil, diplomatik və iqtisadi uğurun ifadəsidir. Boru kəmərləri vasitəsilə ən çox ölkəyə qaz ixrac edən dövlət kimi Azərbaycanın mövqeyi həm iqtisadi, həm də siyasi çəkimizin artdığını göstərir. Xüsusilə Avropa bazarında Almaniya və Avstriya kimi yeni istiqamətlərin əlavə olunması enerji marşrutlarının şaxələndirilməsinə mühüm töhfədir.”
Deputat Azərbaycanın enerji siyasətində humanitar ölçünün də önəmli yer tutduğunu qeyd edib. Onun sözlərinə görə, Suriyaya 1,5 milyard kubmetr qazın tədarükü yalnız kommersiya xarakteri daşımır, eyni zamanda sosial sabitliyə dəstək kimi qiymətləndirilməlidir.
Gələcək perspektivlərə toxunan millət vəkili bildirib ki, Şahdəniz yatağının yeni mərhələsi üzrə 2028-ci ildən etibarən əlavə 10–15 milyard kubmetr qaz hasilatı potensialı Azərbaycanın ixrac imkanlarını daha da genişləndirəcək. Bu isə həm mövcud tərəfdaşların tələbatının ödənilməsi, həm də yeni bazarlara çıxış üçün möhkəm zəmin formalaşdıracaq.
Novruzəli Aslanov əlavə edib ki, Azərbaycanın enerji təhlükəsizliyinə töhfəsi yalnız qaz ixracı ilə məhdudlaşmır. Türkiyədə 870 meqavatlıq elektrik stansiyasının əldə olunması və Serbiya ilə 500 meqavatlıq yeni layihə üzrə razılaşma ölkəmizin regional enerji arxitekturasında artıq aktiv investor kimi çıxış etdiyini göstərir.
Deputatın fikrincə, enerji təhlükəsizliyi ilə iqtisadi inkişaf arasında qurulan balans Azərbaycanın beynəlxalq mövqeyini daha da gücləndirir və ölkəmizi qlobal enerji xəritəsində aparıcı aktorlardan birinə çevirir.
