Milli Məclisin deputatı Novruzəli Aslanov 5 mart 2026-cı il tarixində İsmayıllı rayonundan olan seçicilərlə onlayn formatda görüş keçirib.

Shir.az xəbər verir ki, video-formatda qəbulun keçirilməsi üçün texniki baxımdan keyfiyyətli əlaqənin təmin edilməsi məqsədilə millət vəkilinin Bakı və İsmayıllı ofislərində müvafiq avadanlıqlar quraşdırılıb, vətəndaşlarla canlı ünsiyyət üçün işgüzar şərait yaradılıb.

Görüş zamanı İsmayıllı sakinlərini narahat edən bir sıra sosial yönümlü məsələlər və şəxsi müraciətlər deputatın diqqətinə çatdırılıb. Novruzəli Aslanov vətəndaşlar tərəfindən qaldırılan məsələləri qeydə aldığını və onların həlli istiqamətində müvafiq addımların atılacağını bildirib.

Onlayn qəbulda iştirak edən İsmayıllı şəhər sakinləri və rayon ictimaiyyətinin nümayəndələri isə ölkə rəhbərliyinə – İlham Əliyev və Mehriban Əliyevaya İsmayıllı rayonuna göstərilən diqqət və qayğıya görə minnətdarlıqlarını ifadə ediblər.

Qeyd edək ki, millət vəkilinin bu günə planlaşdırılmış İsmayıllı səfəri Azərbaycan Qızıl Aypara Cəmiyyətinin Lənkəran Regional Mərkəzində keçiriləcək yerli bölmələrin operativ müşavirəsi ilə əlaqədar təxirə salınıb. Belə ki, N.Aslanov İsmayıllı sakinləri ilə onlayn görüşünü başa çatdırdıqdan dərhal sonra müşavirədə iştirak etmək üçün Lənkəran şəhərinə yola düşüb.