İyulun 18-də Beyləqan Rayon İcra Hakimiyyətinin başçısı Əziz Əzizovun rayonun Gödəklər kəndində səyyar qəbulu keçirilib.

“Qafqazinfo” xəbər verir ki, səyyar qəbulda hüquq-mühafizə orqanların rəhbərləri, Rayon İcra Hakimiyyəti başçısının müavinləri və şöbə müdirləri, dövlət orqanlarının yerli idarələrinin və xidmət sahələrinin rəhbərləri, qəsəbə sakinləri iştirak ediblər.

Əvvəlcə torpaqlarımızın azadlığı uğrunda həlak olan şəhidlərin xatirəsi bir dəqiqəlik sükutla yad olunub.

Görüşdə Əziz Əzizov bildirib ki, keçirilən səyyar qəbullar Azərbaycan Prezidentinin göstərişi əsasında vətəndaş məmnunluğunu təmin etmək, vətəndaşları narahat edən məsələləri bilavasitə yerlərdə öyrənməklə onların həllini sürətləndirmək məqsədi daşıyır.

Rayon rəhbəri respublikada aparılan sosial-iqtisadi islahatlar barədə məlumat verərək Beyləqan rayonu ilə bağlı qarşıda duran vəzifələrdən danışıb.

Sakinlərin qaldırdıqları müxtəlif məzmunlu müraciətlər yerindəcə araşdırılıb və onların həlli istiqamətində RİH başçısı Əziz Əzizov tərəfindən aidiyyəti üzrə idarə, müəssisə və təşkilat rəhbərlərinə müvafiq tapşırıqlar verilib.