Avqust ayında İsrail Müdafiə Qüvvələrinin mülki şəxslərin Qəzza zolağındakı yaşayış məntəqələrini tərk etmələrini tələb edən əmrləri 213 min fələstinlini əhatə edib.

Shir.az TASS-a istinadən xəbər verir ki, bu barədə BMT-nin İşğal olunmuş Fələstin Ərazilərindəki Humanitar Məsələlərin Əlaqələndirilməsi İdarəsinin nümayəndəliyi məlumat yayıb.

“Avqustun əvvəlindən İsrail hərbçiləri Xan Yunis, Deyr əl-Bələh və daha az dərəcədə Qəzzanın şimalında təxminən 213 min nəfəri əhatə edən 9 təxliyə əmri verib”, - təşkilatın saytında dərc olunmuş hesabatda bildirilib.

Beynəlxalq təşkilatın məlumatına görə, Əl-Məvasi bölgəsində əhalinin sıxlığı kəskin artaraq hər kvadratkilometrə 30-34 min nəfər arasında dəyişir. Münaqişədən əvvəl bu rəqəm hər kvadratkilometrə 1,2 min nəfər olub. Hesabat müəllifləri qeyd ediblər ki, bu, anklavda humanitar vəziyyəti kəskin şəkildə pisləşdirir.