Türkiyə və Rusiya prezidentləri Rəcəb Tayyib Ərdoğan və Vladimir Putin bazar ertəsi telefon danışığı zamanı İsrail və İran arasında davam edən münaqişənin eskalasiyası ilə bağlı ciddi narahatlıqlarını ifadə ediblər.

Bu barədə Shir.az Kremlin mətbuat xidmətinə istinadən xəbər verir.

"Telefon danışığı zamanı əsas diqqət Yaxın Şərqdə kəskin şəkildə gərginləşən vəziyyətə yönəldilib. Vladimir Putin və Rəcəb Tayyib Ərdoğan İsrailin İrana qarşı həyata keçirdiyi güc aksiyasını pisləyiblər. Hər iki tərəf artıq çox sayda qurbanlarla nəticələnən və bütün region üçün ağır nəticələrə səbəb ola biləcək İran-İsrail münaqişəsinin davam edən eskalasiyası ilə bağlı ciddi narahatlıqlarını ifadə ediblər", - məlumatda qeyd olunub.

Türkiyə və Rusiya liderləri döyüş əməliyyatlarının dayandırılması və mübahisəli, o cümlədən İran nüvə proqramına aid məsələlərin yalnız siyasi-diplomatik vasitələrlə həll edilməsi üçün çağırış ediblər.

İki ölkənin müvafiq qurumlarının bu məsələdə sıx qarşılıqlı fəaliyyətdə olacağı razılaşdırılıb.

"Ukrayna məsələsinin müzakirəsi zamanı Vladimir Putin birbaşa Rusiya-Ukrayna danışıqlarının təşkilində göstərdiyi dəstəyə görə Türkiyə tərəfinə minnətdarlığını bildirib", - məlumatda vurğulanıb.

Bundan əlavə, tərəflər ikitərəfli gündəliyin aktual məsələləri, o cümlədən energetika sahəsi üzrə fikir mübadiləsi aparıblar: "Bu mövzular Sankt-Peterburq Beynəlxalq İqtisadi Forumu çərçivəsində Rusiya-Türkiyə əlaqələri və iyun ayının sonunda keçiriləcək ticari-iqtisadi əməkdaşlıq üzrə Hökumətlərarası Komissiyanın iclası zamanı nəzərdən keçiriləcək".