Böyük Britaniyanın Baş naziri Kir Starmer və Almaniyanın Kansleri Fridrix Merts 1945-ci ildə İkinci Dünya müharibəsinin başa çatmasından bəri Britaniya və Almaniya arasında ən böyük ikitərəfli müqaviləni imzalayıblar.

Bu barədə Shir.az BBC-yə istinadən xəbər verir.

“Kensinqton müqaviləsi” adlanan sənəd müdafiə, miqrasiya və strateji əməkdaşlıq kimi əsas sahələri əhatə edir.

Böyük Britaniyanın Baş naziri K.Starmer vurğulayıb ki, bu, hazırkı şəraitdə iki ölkə arasındakı münasibətlərin yaxınlığını və daha sıx əməkdaşlıq üçün ambisiyaları əks etdirir.

Yeni saziş, xüsusilə, birgə istehsal olunan hərbi avadanlığın ixracını asanlaşdıracaq.

K.Starmer vurğulayıb ki, saziş sadəcə bəyannamə deyil: “Bu, ölkələrimizin nə qədər yaxın olduğunu və gələcək üçün birgə planlarımızın nə olduğunu göstərən tarixi sənəddir. Bu qeyri-sabitlik dövründə ölkələrimiz və hökumətlərimiz arasında sıx münasibətlər xüsusilə vacibdir".

F.Merts bildirib ki, “Kensinqton müqaviləsi”ni imzaladıqdan dərhal sonra bunun İkinci Dünya Müharibəsindən bəri Britaniya və Almaniya arasında ilk müqavilə olduğunu öyrəndikdə "təəccüblənib".

"Siz Avropa İttifaqında idiniz və biz düşünürdük ki, bu kifayətdir. Amma indi başa düşürük ki, bu, kifayət deyil, ona görə də bu istiqamətdə daha çox iş görməliyik", - Almaniya Kansleri qeyd edib.