İlham Əliyevin Prezident seçilməsindən 22 il ötür - TARİXİ GÜN

Shir.az xəbər verir ki, bu gün - 15 oktyabr 2025-ci il - Azərbaycan Respublikasının Prezidenti, Müzəffər Ali Baş Komandan İlham Əliyevin Prezident seçilməsinin 22-ci ildönümüdür.

2003-cü il oktyabrın 15-də keçirilən prezident seçkilərində İlham Əliyev Azərbaycan xalqının böyük etimadını qazanaraq dövlət başçısı seçildi. Onun rəhbərliyi ilə Azərbaycan yeni inkişaf mərhələsinə qədəm qoydu. Son 22 ildə ölkədə iqtisadi islahatlar genişlənib, beynəlxalq əlaqələr güclənib, ordu quruculuğu sürətlənib.

Xüsusilə 2020-ci ildə 44 günlük Vətən müharibəsində qazanılan Zəfər Prezident İlham Əliyevin qətiyyətli liderliyinin və düzgün strateji siyasətinin nəticəsi oldu. Bu Qələbə nəticəsində Azərbaycan torpaqlarını 30 illik işğaldan azad etdi və ərazi bütövlüyünü bərpa etdi.

Hazırda dövlət başçısının rəhbərliyi ilə işğaldan azad olunmuş ərazilərdə genişmiqyaslı bərpa və quruculuq işləri aparılır, Böyük Qayıdış Proqramı uğurla icra olunur. İlham Əliyev həm də türk dünyasında, regionda və beynəlxalq aləmdə güclü siyasi lider kimi tanınır.

Prezident İlham Əliyev bu illər ərzində xalqın iradəsini ifadə edən bir lider kimi tarixə adını qızıl hərflərlə yazdırmağı bacarıb.