Nərimanov Rayon Polis İdarəsinin təşəbbüsü ilə 45 nömrəli tam orta məktəbdə “Narkomaniyaya yox deyək, gələcəyimizi qoruyaq” mövzusunda maarifləndirici tədbir keçirilib.
Tədbir iştirakçıları əvvəlcə torpaqlarımızın azadlığı uğrunda canlarını fəda edən igid oğullarımızın əziz xatirəsini bir dəqiqəlik sükutla yad ediblər. 

Narkomaniyanın dünyanı məhvə sürükləyən və qarşısı alınmaz bəlaya çevrildiyini deyən Rayon Polis İdarəsinin rəisi polis polkovniki Arzu Heydərov  onunla mübarizədə bütün dövlət qurumlarının səfərbər olduğunu diqqətə çatdırıb.
O, bildirib ki, bu gün ölkəmizdə gənclərin layiqli vətəndaş kimi formalaşması, onların həyatın bütün sahələrində uğur əldə etmələri, zərərli vərdişlərdən uzaq durmaları  üçün dövlətimiz bütün imkanlarını səfərbər edib.  Paytaxtımızda olduğu kimi, respublikamızın hər bölgəsində idman olimpiya kompleksləri, idman qurğuları tikilib, qurulub və gənclərin ixtiyarına verilib.
Qeyd olunub ki, narkotiklərlə mübarizədə hüquq mühafizə orqanlarının qətiyyətli mübarizə tədbirləri, həmçinin belə maarifləndirici görüşlər  gələcəyimiz olan uşaqları, gəncləri qorumağa yönəlib. Belə ki, ötən müddət ərzində idarənin əməkdaşları tərəfindən keçirilən uğurlu əməlliyyat tədbirləri ilə narkotiklərlə bağlı 222 fakt qeydə alınıb, qanunsuz dövriyyədən 80 kiloqram 642 qram narkotik vasitə çıxarılıb.
Fiziki baxımdan sağlam, zərərli vərdişlərdən uzaq olan gənclərin sayəsində Vətən müharibəsində şanlı Zəfər qazandığımızı, antiterror tədbirlərindən sonra isə suverenlyimizin bərpa olunduğunu vurğulayan tədbir iştirakçıları “ağ ölüm”lə mübarizədə hər birimizin üzərinə böyük məsuliyyət düşdüyünü diqqətə çatdırıblar.

Sonda narkotik vasitələrin zərərlərindən bəhs edən videoçarx nümayiş olunub və şagirdləri maraqlandıran suallar cavablandırılıb.